Ақын десе күллі жұрттың көз алдына әуелі Абай келеді. Себебі, оның өнегелі өлеңдері өркениет көшінде өміршеңдігін көрсетуде. Жалпы адамзат руханияты хакім жырларын әрдайым қажет ететіні шындық. Ұлы тұлға өз заманында үлкенге де, кішіге де жол нұсқап, ұстаздық етті. Ал қарасөз зергерінің шәкірттері жазған өлеңдерді бүгінгі буын ұмытпауы керек.
Абайға Көкбай Жанатайұлы, Мұқа Әділханұлы, Шәкәрім Құдайбердіұлы, Әсет Найманбайұлы, Ақылбай Абайұлы, Мағауия Абайұлы, Тұрағұл Ибрагимов сынды тетелес аға-бауырлары мен балалары шәкірт болған. Олар тәлім алып, жазған өлеңдерін ақын алдында оқып беретін. Жырға құмар өз дәуірінің зиялылары Абайдың тапсырмасымен көптеген поэмаларды, жыр-дастандарды өмірге әкеледі. Оны білу, зерделеу әдебиетке жаны жақын баршамыздың міндетіміз.
Бұл күнге дейін қазақ ақындарының 40-тан астам өлеңін жаттадым. Оның жартысынан көбі Абай шәкірттерінің шығармалары. Соның ішінде ел ести бермеген Көкбай Жанатай- ұлының «Дүтбайға», «Күлембайға», «Құлынды», «Қандыжап», Мұқа Әділханұлының «Дунай толқындары», «Көкен» сынды көп жырлары бар.
Халық басқа ақындарды дәріптегендей Абай тұнығынан сусындаған шайырларды да әспеттесе екен деймін. Өйткені қазақ әдебиетіне үлес қосқан асылдарымыздың есімі елмен бірге жасай беруі ләзім.
Айғаным ҚОЙШЫБЕК,
Күреңбел қазақ орта мектебінің 11 «Б» сынып оқушысы
