Елімізде ұлттық өнер мен спортты ұштастырған айтулы іс-шаралар арқылы тарихи тұлғаларды ұлықтау дәстүрі жаңа қарқынмен жалғасып келеді, – деп хабарлайды 7-su.kz ақпараттық порталы ognialatau.kz сайтына сілтеме жасап.
Қазақ кино өнерінің заңғары, көрнекті режиссер Абдулла Қарсақбаевтың 100 жылдық мерейтойына орай оның туған жерінде қашықтығы 100 шақырымды құрайтын бірегей бәйге ұйымдастырылды. Ұлттық спорт сайысына Қазақстанның барлық өңірінен және бауырлас Қырғызстаннан 63 сәйгүлік қатысты. Шабандоздар Үлгілі ауылдық округінің Қаншеңгел ауылынан Самсы ауылдық округінің Қопа станциясына дейінгі аралықты 3 сағатта басып өтті. Аталған бәйге Алматы облысында алғаш рет ұйымдастырылып, мыңдаған көрерменнің басын қосты.
Аламан жарыста маңғыстаулық Адай тұқымды «Бесжүйрік» атты сәйгүлік топ жарып, суырылып алға шықты. Шабандозы Нұрсұлтан Омаров баптаған тұлпар шөлді де далалы аймақтарда жүздеген шақырымды бағындыра алатын төзімділігімен дараланды. Екінші орынды Жетісу облысынан келген Қабай Даригербек тізгіндеген «Аққұм» иеленсе, үшінші орынға Жетісу облысының намысын қорғаған Сұңғат Қайратовтың «Жетіжал» аты табан тіреді. Шараға қатысқан аттардың барлығы да аяз бен аптапқа шыдамды жергілікті қазақы тұқымнан сайланған.
Жамбыл ауданының әкімі Нұрлан Ертас пен белгілі қоғам қайраткерлері жеңімпаздарды салтанатты түрде құттықтап, бірінші орын иегеріне су жаңа автокөлік сыйлады. Сондай-ақ қалған жүлдегерлерге арнайы ақшалай сертификаттар тапсырылды. Жамбыл ауданының әкімі Нұрлан Ертас маңызды шараның мән-мағынасына тоқталып, былай деді:
«Биыл бүкіл әлемдік қауымдастық отандық және халықаралық кино тарихында өшпес із қалдырған жерлесіміз Абдулла Қарсақбаевтың 100 жылдығын атап өтуде. Аталған атаулы дата ЮНЕСКО-ның 2026 жылға арналған атаулы күндер күнтізбесіне енгізілген. 1967 жылы Канн кинофестивалінде жүлде алған «Менің атым Қожа» фильмінің авторына арналған бүгінгі бәйге – тарихи тағзымның айқын көрінісі».
Мерекелік шара «Сүйінбай сазы» ансамблі дайындаған концерттік бағдарламамен ұласты. Жиында Абылай хан мен Нұрғиса Тілендиевтің туындылары шырқалып, көрерменге ерекше рух сыйлады. Ұйымдастырушылар атынан сөз алған Орынтай Әмірғалиев бұл бәйгенің Ата-бабадан келе жатқан ұлттық дәстүрді жаңғыртуға бағытталған игі бастама екенін атап өтті. Режиссердің жақын туысы Дәулет Жарасбаев пен Махаббат Бигельдиевтің қолдауымен қолға алынған бұл аламан жарысты алдағы уақытта жыл сайын дәстүрлі түрде өткізу жоспарланып отыр.
