Әдебиет – адамзаттың рухани қазынасы, ұрпақтан ұрпаққа жалғасып келе жатқан асыл мұра. Әсіресе жастар үшін әдебиеттің орны ерекше, себебі, ол тұлғаның жан-жақты қалыптасуына тікелей әсер етеді. Кітап оқу арқылы жас ұрпақ тек білім алып қана қоймай, дүниетанымын кеңейтіп, өмірге деген көзқарасын қалыптастырады.
Ең алдымен, әдебиет жастардың ой-өрісін дамытады. Әртүрлі жанрдағы шығармаларды оқу арқылы адам жаңа идеялармен танысып, өз ойлау қабілетін жетілдіреді. Сонымен қатар, әдебиет тіл байлығын арттырып, дұрыс әрі көркем сөйлеуге үйретеді. Бұл – әсіресе қазіргі заманда өте маңызды, өйткені тіл мәдениеті адамның жалпы мәдениетінің көрсеткіші.
Мен үшін әдеби шығармаларды оқу – жай ғана уақыт өткізу емес, ол мүлде бөлек әлемге сапар шеккенмен тең. Әр оқыған шығарма бір нәрсеге үйретеді. Сабырлы болуға, адамдарды түсінуге, өмірге басқа қырынан қарауға. Кейде бір ғана сөйлемнің өзі ұзақ уақыт ойымнан шықпай, маған үлкен әсер қалдырады. Қолымa кітап алған сайын мен басқа бір өмірге енгендей боламын. Кейде кейіпкермен бірге қуанып, қайғысын сезінемін.
Әдеби шығармалардың тәрбиелік мәні де зор. Көркем туындылардағы кейіпкерлердің өмірі, іс-әрекеті, таңдауы жастарға үлгі болады. Олар арқылы жас оқырман жақсы мен жаманды, дұрыс пен бұрысты ажырата алады. Кейіпкерлердің басынан өткен қиындықтары мен жетістіктері өмірдің шынайы көрінісін көрсетіп, жастарды сабырлылыққа, еңбекқорлыққа, адалдыққа тәрбиелейді.
Қорытындылай келе, әдебиет – жастардың рухани дамуының негізі. Ол ой-сананы жетілдіріп, адамгершілік қасиеттерді қалыптастырады және өмірге дұрыс бағыт береді. Әдебиетті оқитын ұрпақ – болашағы жарқын, саналы қоғамның кепілі.
Елдана Жетпісбаева,
ЖУ-дің студенті
