Күрес өнерінде ерекше құбылыс болып, әр әдісі мен әрекеті жанкүйерлердің жадында жатталып, күні бүгінге дейін халық аңызға балап әспеттеп отыратын тұлғаның бірі – Әбілсейіт Айханов. Дәстүр бойынша жылда Талдықорған төрінде өтетін балуанды еске алуға арналған республикалық турнир жас спортшылардың танылуына жол ашып келеді. Биылғы бәсекенің жөні бөлек. Жеңімпаз болған 23 жасқа дейінгі жастар Қазақстан ұлттық құрамасына қабылданып, ел намысын қорғайды.
– Қазақтың күрес мектебінің мықты екенін танытқан санаулы үздіктеріміздің бірі. Кеңес кезінде түрлі жарыстарда жеңіске жетіп, халықаралық бәсекелерде топжарғанымен белгілі бір себептермен ол кісіні Әлем чемпионаты, Олимпиада ойындарына қатыстырмады. Егер қатысқан жағдайда жеңіске жететініне еш күмәніміз жоқ. Ол кісінің кілемдегі іс-әрекеті бүгінгі жастарға үлгі, – дейді Атланта Олимпиадасының жүлдегері Мәулен Мамыров.
Тұрақты өтіп келе жатқан Әбілсейіт Айхановты еске алуға арналған жастар арасындағы республикалық турнирдің осы жолғы жеңімпаздары қазанда Сербияда өтетін Әлем чемпионатында күш сынайды. «Жастар» спорт сарайында өткен жарысқа 10 салмақ бойынша 200-ден астам спортшы қатысты.
Командалық есеп бойынша Алматы қаласы 1-орын, 2 орынды Жетісу облысы алса, үштікті Түркістан облысының балуандары түйіндеді. Електен өтіп, әр кездесуде жоғары деңгейде шеберлік көрсеткен шымкенттік Жахангір Ахмаджанов (57 келі), алматылық Мерей Базарбаев (61 келі), қызылордалық Төлен Рүстем (65 келі), маңғыстаулық Майис Алиев (70 келі), ақмолалық Диас Сағдатов (74 келі), алматылық Ерхан Әбіл (79 келі), маңғыстаулық Мұхамбет Мамбетов (86 келі), жетісулық Айбек Айтбеков (92 келі), астаналық Нұрсейіт Тоқтар (97 келі) және ақтөбелік Бауыржан Советов (125 келі) жеңіс тұғырынан көрінді.
– Жастарымыз жалындап тұр. Жақында ғана жастар арасындағы әлем чемпионатында 92 келіде күрескен Самир Тұрсынов қола медаль алды. Ал бұл жарыстың деңгейі жыл санап өсіп жатыр. Осы додадан іріктеліп алған балуандарымыздың нәтижесін көріп, жылда аяқ алысын байқап келеміз. Осындай ірі турнирлер керек, – дейді ҚР жастар құрамасының аға жаттықтырушысы Рүстем Өмірәлиев.
Серік ҚАНТАЙ
