Мәжіліс депутаты Асхат Аймағамбетов Назарбаев Зияткерлік мектептерінде (НЗМ) смартфон қолдануға шектеу қою бастамасын қолдады. Ол бұл қадамды «жеңіл шешім емес, бірақ уақыт талабына сай дұрыс қадам» деп бағалады, – деп хабарлайды 7-su.kz.
Депутаттың айтуынша, бүгінде Қазақстандағы көптеген мектептер осындай ережелерді енгізе бастады.
– НЗМ басшылығының шешімі батыл әрі орынды. Бұл – технологиямен күрес емес, балалардың назарын сабаққа аударып, білім мен қарым-қатынасқа көбірек көңіл бөлуге бағытталған қадам, – деді Аймағамбетов.
Оның сөзінше, халықаралық тәжірибе де мұндай шектеулердің тиімділігін дәлелдеп отыр. Көптеген дамыған елдердің жетекші мектептерінде смартфонға тыйым әлдеқашан енгізілген. Тіпті кейбір Еуропа мемлекеттерінде бұл заңнамалық деңгейде бекітілген.
ЮНЕСКО деректеріне сәйкес, 2024 жылдың соңына қарай әлемдегі білім беру жүйелерінің 40 пайызы мектептерде смартфон қолдануға ресми түрде шектеу қояды.
Аймағамбетов бұл бастама оқушылардың ойын бөлмей, шынайы білім алуына және бір-бірімен тікелей қарым-қатынас орнатуына мүмкіндік беретінін атап өтті.
