Қаратал ауданындағы Кемел Тоқаев атындағы қайырымдылық қоры мұқтаж отбасыларға, дарынды балаларға үлкен қолдау көрсетуде. Атап айтсақ, биыл тұрғындардың өтінішіне орай 50 орынды дәрігерлік амбулатория тұрғызып, оны қажетті медициналық құралдармен жабдықтап, халықтың игілігіне берді.
Тұрғындардың сапалы медициналық ем алуына жағдай жасау мақсатында амбулатория ультрадыбыстық зерттеу құрылғысы, дефибриллятор-4, ЭКГ-1 сынды заманауи медициналық құрал-жабдықтармен қамтамасыз етілген. Медициналық орталықта білікті мамандар жұмыс істейді.
Үштөбе қаласының тұрғындары медициналық нысанның ашылуына ризашылығын білдіруде.
– Қордың есебінен ел игілігіне жап-жаңа, еңселі медициналық нысан беріліп отыр. Ғимараттың ашылуына үлес қосқан барша азаматқа алғысымыз шексіз, – дейді қала тұрғыны Жарбол Ертайұлы.
Айта кетейік, қордың жәрдемімен Үштөбедегі К. Тоқаев атындағы мектеп заманауи техникалық, спорттық және музыкалық құралдармен жабдықталды, балалардың ойын алаңы, аллея салынды. Ұзақ жыл бойы Кемел Тоқаев қоры шығармашылық дарынды балаларға қолұшын созып, еліміздің және шетелдердің үздік жоғары оқу орындарында білім алуына мүмкіндік жасап келеді. Қордың қаржысына ауданда гуманитарлық колледж салынып, пайдалануға берілді. Оған қоса мал шаруашылығы кешені салынып, оған 500 бас қазақтың ақбас сиыры әкелінді. Қазіргі уақытта жұмыс істеп тұр. Ендігі кезекте шоколад цехын ашу қолға алыныпты.
А. НАЗАРҰЛЫ
