Жетісу облысында ірі көлемдегі бюджет қаражатын жымқыруға жол берген лауазымды тұлғаға қатысты сот үкімі шықты. Алакөл ауданы әкімінің орынбасары электр желілерін жаңғырту кезіндегі заңсыздықтары үшін бас бостандығынан айырылды, – деп хабарлайды 7-su.kz ақпараттық порталы.
Өңір прокуратурасы мәліметінше, Алакөл ауданының Арқарлы ауылында электр желілерін салу және қайта жаңғырту кезінде аудан әкімінің орынбасары қызметтік өкілеттігін асыра пайдаланып, орындалмаған жұмыстар туралы актілерге қол қойған.
Осылайша бюджет есебінен 189 миллион теңгеден аса сома заңсыз аударылған.
«Мемлекеттік айыптау лауазымды тұлғаның кінәсін толық дәлелдеген. Алакөл аудандық сотының үкімімен аудан әкімінің орынбасары мүлкін тәркілемей, 5 жылға бас бостандығынан айырылды. Сондай-ақ, мемлекеттік қызметте, мемлекеттік ұйымдарда және квазимемлекеттік сектор субъектілерінде қызмет атқару құқығынан өмір бойына айырылды», – делінген хабарламада.
