Алакөл ауданының ауыл шаруашылығы және жер қатынастары бөлімінің ұйымдастыруымен аудан шаруа қожалықтары басшыларына су пайдалану саласындағы цифрландыру және электрондық келісімшартқа көшу тәртібі бойынша түсіндіру жұмыстары жүргізілді.
Жиын барысында су ресурстарын тиімді пайдалану, келісімшарттарды электронды форматта рәсімдеу тәртібі және саладағы жаңа талаптар кеңінен талқыланды. Басқосу суармалы егіншіліктің маңыздылығы артып отырған кезеңде су үнемдеу мәдениетін қалыптастыру мен ашықтықты қамтамасыз етуге бағытталды.
Аудандық ауыл шаруашылығы және жер қатынастары бөлімінің бас маманы Әли Сембаев су пайдалану жүйесін цифрландыру – саладағы тәртіпті күшейтіп, нақты есеп жүргізуге мүмкіндік беретін маңызды қадам екенін атап өтті.
– Бүгінде су көлемін есепке алу, келісімшарттарды уақытылы рәсімдеу және төлем тәртібін реттеу мәселелері өзекті. Электрондық форматқа көшу – адами факторды азайтып, процесті жеңілдетеді әрі шаруаларға қолайлы жағдай жасайды, – деді ол.
«Қазсушар» РМК Жетісу облысы бойынша филиалы директорының орынбасары Думан Сайламбаев су жеткізу қызметінің жаңа талаптары мен тарифтік саясаттағы өзгерістерге тоқталды. Оның айтуынша, элек-трондық келісімшарттар су беру кестесін нақтылауға және тұтынушылармен жұмысты жүйелеуге мүмкіндік береді.
– Су – стратегиялық ресурс. Әр текше метрдің есебі болуы тиіс. Цифрландыру арқылы біз су шығынын азайтып, әділ бөлуге қол жеткіземіз, – деді ол.
Су ресурстарын реттеу, қорғау және пайдалану жөніндегі Бал- қаш – Алакөл бассейндік инспекциясы мемлекеттік бақылау бөлімінің бас маманы Бағжан Керімханов су заңнамасын сақтау мәселесіне ерекше тоқталды.
– Су пайдалану талаптарын бұзу әкімшілік жауапкершілікке әкеледі. Сондықтан келісімшарттарды заң талаптарына сай рәсімдеу және бекітілген лимиттен аспау әр шаруаның міндеті, – деп ескертті маман.
Алакөл өндірістік учаскесінің су нысандарын пайдалану бөлімінің инженері Аслан Омаров техникалық тұрғыдағы жаңашылдықтарға тоқталып, су беру жүйесіндегі автоматтандыру элементтері кезең-кезеңімен енгізіліп жатқанын жеткізді.
– Алдағы уақытта су есептегіш құрылғыларын жаңарту және нақты мониторинг жүргізу жұмыстары күшейтіледі. Бұл суды тиімді пайдалануға оң әсерін тигізеді, – деді инженер.
Жиын барысында шаруалар тарапынан электрондық келісімшарт жасау тәртібі, құжаттарды рәсімдеу мерзімі және су беру кестесіне қатысты сұрақтар қойылып, сала мамандары тарапынан нақты жауаптар берілді.
Жалпы, аталған түсіндіру жұмыстары су ресурстарын ұтымды пайдалану, цифрлық жүйеге көшу және ауыл шаруашылығы саласында ашықтық пен тәртіпті күшейту бағытындағы маңызды қадамдардың бірі ретінде бағаланды.
Қажет АНДАС
Алакөл ауданы
