Цифрлық дәуірдің дамуы қаржы саласын жаңа деңгейге көтеріп отыр. Уақыт өткен сайын төлем жасау тәсілдері жеңілдеп, қауіпсіздік деңгейі күшейіп келеді. Соның айқын дәлелі – Kaspi.kz компаниясының жаңа инновациялық жобасы – Kaspi Alaqan.
Өткен айдың 31-і күні Almaty Theatre сахнасында өткен ресми таныстырылымда Kaspi.kz негізін қалаушы Михаил Ломтадзе бұл сервистің қазақстандықтар үшін ерекше мүмкіндік екенін атап өтті. Енді кез келген Kaspi қолданушысы телефонсыз, картасыз, тіпті интернетсіз де «алақан» арқылы төлем жасай алады.
«Kaspi Alaqan» адамның алақан сызықтары мен тамыр өрнектерін тану технологиясына негізделген биометриялық төлем жүйесі. Яғни әрбір адамның алақаны бірегей «цифрлық кілт». Төлем жасау үшін Kaspi терминалына немесе сканерге алақаныңды жақындату жеткілікті. Бір сәт ішінде жүйе жеке деректерді сәйкестендіріп, төлемді растайды.
Бұл тәсіл жылдамдық пен ыңғайлылықты қамтамасыз етеді. Телефон іздеп, карта шығарып, QR сканерлеудің қажеті жоқ. Қолың өзіңмен – төлем де өзіңмен.
Сондай-ақ, Kaspi өкілдерінің айтуынша, алақан іздері жеке биометриялық код түрінде шифрланып, деректер Kaspi жүйесінде қорғалған серверлерде сақталады. Бұл ақпарат ешкімге берілмейді және төлем жасау кезінде де ашық күйде қолданылмайды. Өйткені алақан биометриясы бөгде адам үшін қолдануға келмейтін ең сенімді тәсілдердің бірі. Себебі, әр адамның алақанындағы тамыр құрылымы қайталанбайды, ал сканер тек тірі адамның қан айналымын анықтап барып жұмыс істейді. Бұл алақан бейнесін суретпен немесе жасанды құралмен алдауға жол бермейді деген сөз.
Kaspi Alaqan қызметі уақыт үнемдейді, қолма-қол ақшасыз есеп айырысуды одан әрі дамытуға ықпал етеді. Сондай-ақ, көлеңкелі экономиканы азайтуға, қаржылық ашықтықты арттыруға да мүмкіндік береді.
Сонымен бірге, жаңа жүйе инклюзивті шешім бола алады: интернетке қосылу немесе құрылғы болмаған жағдайда да төлем жасау мүмкіндігі шалғай аймақтар үшін үлкен артықшылық. Қорыта айтсақ, Kaspi Alaqan – технология мен сенімділіктің түйіскен тұсы. Бұл жоба қазақстандық финтех нарығының тағы бір серпілісі, әлемдік трендтермен тең деңгейде тұрған айқын жетістік.
Санжар Сұлтанғазы
