Бразилияның Сан-Паулу қаласында волейболдан клубтар арасындағы әлем чемпионаты басталды. «Жетісу» «А» тобындағы алғашқы ойынын италияның «Савино Дель Бене» командасына қарсы өткізіп, 0:3 (22:25, 21:25, 20:25) есебімен жеңілді.
– Еуропаның ғана емес, Әлемнің үздік командаларының бірімен ойнадық. Командамызға сәл сәттілік жетпеді. Ендігі ойындарда ұпай алуға барымызды саламыз, – дейді «Жетісу» волейбол клубының ойыншысы Перизат Нұрбергенова.
«Савино Дель Бенемен» болған матчта жетісулықтар сапынан Татьяна Никитина үздік болды. Ол ойын барысында 10 ұпай жинады. Одан кейін Кристина Беловамен (9 ұпай), Кристина Аниконова (8 ұпай) тұр. Бұл матчта Қытай құрамасының ойыншысы Мяо Йвэнь «Жетісу» сапындағы алғашқы ойынын өткізді.
«Савино Дель Бене» командасының байланыстырушысы, тәжірибелі ойыншы Майя Огненович:
– Сіздердің командаларыңыз таланатты әрі тактикалық тұрғыда жақсы екендіктерін көрсетті. Шыны керек біз бұндай қарсылықты күтпедік. Командаларыңыз тосқауылда, қорғаныста жақсы ойнады. Бүгінгі жеңіске біздің тәжірибеміз көп көмектесті деп ойлаймын, – деді.
Одан бөлек «Савино Дель Бене» командасының ойыншысы, Олимпиада және Әлем чемпионы Екатерина Антропова:
– О баста ойынның қиын болатындығын білдік. Қыздар жарады. Доп қабылдау барысында қателік көп жіберген жоқ. Менің ойынға қосқан доптарымның өзін еркін қабылдап отырды, әрине мен үшін өкіншті жағдай. Ал командадан ерекшеленген екі ойыншы болса, бірі 13 нөмірдегі (ред.Кристина Белова) волейболшымен диагоналдағы шабуылшы (ред. Татьяна Никитина) біз үшін көп мәселе туғызды, – дейді.
«Жетісу» енді екінші ойынын перудің «Альянца Лима» командасына қарсы ойнайды. Перудің командасы бірінші ойынында бразилияның «Озаску Сан-Кристован» командасынан 0:3 есебімен жеңілген еді.
Серік ҚАНТАЙ
Сан-Паулу, Бразилия
