Биыл алғаш рет ҚР Еңбек және халықты әлеуметтік қорғау министрлігі «Әлеуметтік қорғау жүйесінің үздік жұмыскері және үздік әлеуметтік жоба» атты республикалық конкурстың жарияланғанын қуанышпен хабарлады. Жарыс екі деңгейден тұрады. Облыстық сыннан үздік шыққандар кейін республикалық конкурсқа қатысады.
Конкурс жөнінде Бейсен Құранбек атындағы Журналистер үйіне арнайы келген облыстық жұмыспен қамтуды үйлестіру және әлеуметтік бағдарламалар басқармасы басшысының орынбасары Сәния Наурызбаева кеңінен айтты.
– Конкурс «Арнаулы әлеуметтік қызмет көрсету орталығының үздік әлеуметтік жұмыскері», «Үйде қызмет көрсету ұйымының үздік әлеуметтік жұмыскері», «Үздік мемлекеттік әлеуметтік инспектор», «Медициналық-әлеуметтік сараптаманың үздік жұмыскері», «Үздік әлеуметтік педагог», «Еңбек мобильділігі орталығының (мансап орталығының) үздік жұмыскері» және «Үздік әлеуметтік жоба» сынды 7 номинациядан тұрады. Өңірлік деңгейдегі конкурсқа өтінім қыркүйек айының 30-на дейін қабылданады. Бүгінде комиссия құрамы жасақталып, облыс әкімі орынбасарының шешімімен бекітілді. Ал қатысушылар алдымен бірыңғай платформада ашық онлайн дауыс беруден өтіп, одан іріктелгендер 9–12 қазанда облыстық комиссия отырысында қаралады. Електен өткен құжаттар республикалық конкурсқа жіберіліп, нәтижесі 23 қазанда шығады, – деді Сәния Дүйсенбіқызы.
Қатысушылардың өтінімді қағаз түрінде облыстық жұмыспен қамтуды үйлестіру және әлеуметтік бағдарламалар басқармасы қабылдаса (байланыс телефоны: 8/7282/32-92-61), электронды нұсқасын Еңбек және халықты әлеуметтік қорғау министрлігінің сайтына (https://qamqor.enbek.kz/) жүктей алады.
Жалпы конкурстың негізгі мақсаты – халықты әлеуметтік қорғау жүйесінің үздік жұмыскерін анықтап, әлеуметтік сала мамандарының қоғамда танылуын және кәсіби мәртебесін арттырып, кәсіби имиджін нығайту. Одан бөлек, азаматтардың осал санаттарын қолдауға бағытталған үздік жобаларды, үздік қызметкерлерді анықтау.
Қали АСҚАР
