Облыс орталығындағы Е. Берліқожаұлы атындағы №11 орта мектебінде өткен алғашқы қоңырауда сөз алған Ернат Дүйсенбекұлы мектеп ұжымы мен оқушыларды мерекемен құттықтап, жаңа оқу жылына табыс тіледі.
– Жаңа оқу жылында қала мектептерінде 36 364 оқушы білім алса, олардың 4 мыңға жуығы мектеп табалдырығын алғаш аттап отырған балдырғандар. Кішкентай бүлдіршіндеріміздің талабы оң, қадамы сәтті болсын. Біз мектеп жасындағы оқушылардың сапалы білім алып, болашақтарының жарқын болуына тілектесбіз. Әрі оларға бар жағдай жасау басты парызымыз, – деді шаһар басшысы.
Қала әкімінің сөзінше, Мемлекет басшысы Қасым-Жомарт Тоқаев білім беру саласын дамытуға қатысты негізгі бес бағытты айқындап берген. Аталған бағыттар аясында әр жылы аймақтағы білім саласын дамытуға баса мән беріліп, жаңа мектептер бой көтеруде. Мәселен, өткен жылы қала аумағындағы Ынтымақ елді мекенінде заман талабына сай жабдықталған 1200 орынды жаңа мектеп қолданысқа берілсе, алдағы уақытта «Батыс» және «Құлагер» шағын ауданынан 200 орынды, «Жастар-2» және «Көктал» тұрғын үй алабында 900 орынды мектеп салу жоспарланған. Қазір аталған білім шаңырақтарының жобалық-сметалық құжаттары әзірленуде. Мұның барлығы білім саласына бағытталған жан-жақты қолдау. Бастысы сапалы білім беру жүйесін дамытып, жас ұрпаққа қолайлы әрі қауіпсіз орта қалыптастыру және ұстаздардың кәсіби беделін арттыру.
Қалалық білім бөлімінің мәліметінше, өткен 2024-2025 оқу жылында облыс орталығындағы білім шаңырақтарында 35 мың оқушы оқыса, биыл 36 мыңнан астам бала білім алмақ. Ал биыл жазда 1442 түлек үлкен өмірге қадам басып, олардың 45-і «Алтын белгі» иегері атанып, 68-і үздік аттестатпен мектеп бітірген. Сонымен қатар 600-ден астам түлек мемлекеттік грантпен оқуға түскен.
Айдын КӘЛІМХАН
