Алимент – таңдау емес, заңмен бекітілген міндет. «Неке (ерлі-зайыптылық) және отбасы туралы» ҚР Кодексіне сәйкес ата-аналар өз балаларына материалдық қолдау көрсетуге міндетті. Бұл – тек қаржылай көмек емес, баланың болашағына деген жауапкершілік. Алайда бұл қарапайым ақиқатты түсінуден қашатын азаматтар әлі де көп.
Жыл сайын Қазақстанда он мыңдаған ата-ана алимент төлеуден жалтарады. Қазіргі таңда жеке сот орындаушыларының өндірісінде алиментке қатысты тіркелген іс өте көп. Бұл қоғамдағы жауапкершіліктің төмендігін көрсетуде. Тіпті кейбір борышкерлер ел аумағынан тыс жерлерге кетіп, табысын жасырып, бала алдындағы міндетін елеусіз қалдырады.
Жеке сот орындаушы борышкердің мүлкі мен табысын анықтап, алиментті өндіріп алуға заң жүзінде әрекет етеді. Мүлікке тыйым салу, шоттарды бұғаттау, көлік жүргізу куәлігін уақытша тоқтату, елден шығуға тыйым салу сияқты шаралар қолданылуы мүмкін. Сонымен қатар, алимент төлемеген азаматқа әкімшілік немесе қылмыстық жауапкершілік те қарастырылған.
Алимент – бұл баланың тағамы, киімі, білімі, денсаулығы. Сондықтан бұл тақырып тек заң аясында емес, адамгершілік тұрғыдан да маңызды. Әрбір ата-ана өз перзентінің алдында моральдық әрі заңдық жауапкершілігін сезінуі тиіс. Ал жеке сот орындаушылары – осы борышты орындатудың соңғы сатысы ғана.
Нұрлан Уақбаев
жеке сот орындаушы
