Алматы облысында жанып жатқан қоқыс полигонына 1700 тоннадан астам су мен топырақ жұмсалып үлгерді. Қатты тұрмыстық қалдықтардың жануын сөндіру жұмысы әлі жүргізілуде. Қазіргі уақытта ашық от пен қалың түтін тоқтаған. Бірақ бықсып жану әлі де жалғасуда. Бұл туралы Алматы облыстық төтенше жағдайлар департаментінің баспасөз қызметі хабарлады.
12 маусымда сағат 17.30-да өрт сөндіру автоцистерналарымен және тікұшақпен 600 тоннадан астам су құйылып, инженерлік техникамен 1200 тоннаға жуық топырақ әкелініп және себілді. Өрт орнына су мен топырақ тасымалданып, қайта құнарландыру жұмыстары жүргізілуде.
Өртті сөндіруге Алматы облысы төтенше жағдайлар департаменті, Іле ауданы әкімдігі, «АДК Таза Әлем» ЖШС және «Алатау-Құс» фабрикасының 100-ден астам адамы мен 50 бірлік техникасы жұмылдырылуда.
Өрт алаңы 3 гектарды қамтыған. Өрт сөндіру күл-қоқыс тереңдігімен күрделене түскен. Яғни, қоқыс тереңдігі 10-15 метрге жуықтаған.
Оқиға орнында жедел штаб құрылды, Іле ауданы әкімдігі жанармай жеткізу және жеке құрам үшін тамақтандыру ұйымдастырды.
Естеріңізге сала кетейік, Іле ауданындағы «Алматы-Өскемен» автожолына (35-нші шақырымы) жақын маңдағы қоқыс полигонынан өрт шыққаны туралы хабарлама облыстық төтенше жағдайлар департаментіне 10 маусымда, сағат 14.26-да келіп түскен еді.
«ЖЕТІСУ-АҚПАРАТ»
