Талдықорғанда бағдаршамның қызыл түсіне өтпек болған жүргізуші екі жастың өмірін қатерге тікті. Қазіргі уақытта аталған дерек бойынша қылмыстық іс қозғалып, тергеу амалдары жүргізілуде.
Сәуірдің екінші жұлдызына қараған түні, сағат 00:10 шамасында Талдықорған қаласындағы Жансүгіров пен Балпық би көшелерінің қиылысында жан түршігерлік жол-көлік оқиғасы орын алды. Куәгерлер мен құзырлы орган өкілдерінің мәліметінше, апатқа бағдаршам ережесін сақтамау себеп болған.
Алдын ала анықталған деректерге сүйенсек, «Toyota Camry» маркалы автокөлігінің жүргізушісі бағдаршамның тыйым салынған қызыл түсіне қарамастан, қиылыстан жылдам өтіп кетпек болған. Осы сәтте ол өзіне рұқсат етілген жасыл түске қозғалып бара жатқан мопедті қаққан. Соққының қатты болғаны соншалық, мопедтегі екі жасөспірім де ауыр жарақаттармен ауруханаға жеткізілді.
Қайрат Абдрахман өзінің «taldykorganec.insta» әлеуметтік желіcінде зардап шеккендердің екеуі де 18 жастағы бозбалалар екенін хабарлады. Соңғы мәліметтер бойынша мопед тізгіндеген жасөспірім есін жиған, ал оның жолаушысы әлі де ес-түссіз күйде жансақтау бөлімінде жатыр. Дәрігерлер оған ми ісінуі деген күрделі диагноз қойып, өмірі үшін күресуде.
Талдықорған қалалық Полиция басқармасы аталмыш факті бойынша қылмыстық іс қозғап, тиісті сараптамаларды тағайындады. Кінәлі жүргізуші анықталды. Қазіргі таңда оқиғаның толық мән-жайы зерттелу үстінде.
Посмотреть эту публикацию в Instagram
Арайлым Абылғазы
ЖУ 4-курс студенті
