Жетісу өңіріндегі ірі өндіріс орындарының бірі саналатын Ақсу қант зауытының ұжымы республикалық референдумға белсенді қатысып, өздерінің азаматтық таңдауларын жасады, – деп хабарлайды 7-su.kz ақпараттық порталы.
Кәсіпорын қызметкерлері арнайы уақыт бөліп, №3 референдум учаскесіне ұйымдасқан түрде келіп, бірауыздан дауыс берді. Зауыт жұмысшылары ел болашағына бейжай қарамай, маңызды саяси науқанда азаматтық белсенділік танытып, қоғамдық жауапкершіліктің жоғары үлгісін көрсетті.
Аталған кәсіпорын өңір экономикасының күретамыры іспеттес, сондықтан зауыт ұжымының саяси маңызды шараға атсалысуы тұрақтылық пен дамуға деген сенімді білдіреді. Дауыс беру сәтінде зауыт өкілі Ерік Құрмансейітұлы:
«Бүгін біз ұжым болып келіп, өз таңдауымызды жасадық. Әр азамат елдің болашағына жауапкершілікпен қарап, осындай маңызды саяси науқандарға қатысуы керек деп ойлаймын. Бұл – біздің азаматтық борышымыз», – деп ойын жеткізді.
Референдум аясында ұсынылған өзгерістер өндіріс саласын қолдауға және еңбек адамдарының құқықтарын нығайтуға бағытталған.
Ақсу қант зауыты сияқты ірі ұжымдардың белсенділігі қоғамдағы ынтымақтастықты нығайтады. Өндіріс орындарының тұрақты жұмыс істеуі мен заңнамалық реформалардың сәтті өтуі тығыз байланысты. Жаңа конституциялық өзгерістер аясында кәсіпкерлік пен еңбек нарығына оң әсер ететін жаңа құқықтық тетіктер қалыптасуда. Зауыт ұжымының бастамасы өзге де өндіріс орындарына үлгі болып, халықтың саяси сауаттылығы мен белсенділігін арттыруға септігін тигізеді. Референдум учаскесіндегі жоғары белсенділік елдегі демократиялық үдерістердің жаңа деңгейге көтерілгенін айқындайды.
