Елімізде соңғы жылдары заман талабына сай жаңа мамандықтар ашылып, жастардың көбі сол салаларға ден қоя бастады. SMM, нейрожелі маманы, байер, таргетолог, мобилограф деген атауларының өзі ерекше. Соның ішінде мобилографиямен айналысатындарды барлық жерден жолықтыруға болады.
Ілияс Қабдол Сарыөзек орта мектебінің 10 «Ә» сыныбының оқушысы. Оқу орнындағы сабақ үлгерімі жақсы, жан-жақты ойлана алатын шәкірттердің бірі. Жаңашылдыққа жаны құмар бозбала болашақта заңгер болам деп айтқанымен оны мобилографтардың өмірі мен жұмысы қызықтырады. Ол 2 жылдан бері мобилографиямен айналысып келеді. Жас буынның пікіріне құлақ түрдік.
– Заңгер болу басты арманым. Мобилограф мамандығын игеру жан қалауым. Қазіргі уақытта мобилография бойынша түрлі жарыстарға қатысып жүрмін. Сол арқылы көп тәжірибе жинадым. Алғашында өз бетімше әлеуметтік желілерден ізденіп үйренген болатынмын. Жалғыз ұялы телефоныңыз болса жеткілікті, қыруар ақша табуға мүмкіндік көп екенін ұқтым. Замандастарымның көбі осы салада жұмыс істегісі келетінін байқаймын. Мобилографтардың артықшылығы материалды жедел жасап, жариялауында. Ол өз кезегінде аз уақытта танымал болуға жетелейді, – дейді жас мобилограф.
«Мобилография» сөзі «мобиль» – «мобильді телефон», «граф» – «жазу, сипаттау, суреттеу» дегеннен шыққан. Осы сала арқылы еліміздің көрікті жерлері дәріптеліп, жаңа мамандықпен шұғылданған азаматтардың қалтасы қалыңдап жүргенін байқаймыз. Олай болса, Ілиястың да болашақта жұртына да, жеріне де пайдасы тиер тұлға болуына тілекшіміз.
Медет ЖҰМАБАЙ
