Бір тілім нанның қадірін білген халқымыз ежелден «ас атасын» қастер тұтқан. «Дастарқанында наны жоқтың, тамағында сәні жоқ» деген сөздің астарында молшылық пен берекенің белгісі жатыр. Ал сол берекенің артында наубайшылардың маңдай тері мен адал еңбегі тұрғанын көбіне ескере бермейміз.
Сарқан қаласындағы «Ардагер» наубайханасының басшысы Әсем Қалабаева – еңбегімен елге танылған кәсіпкердің бірі. Алмалы ауылының келіні, Бірлік ауылының тумасы, мамандығы бойынша сүт өнімдерінің технологы. Жұмыссыз жүрген кезінде үйде нан пісіріп сатуға кіріскен. Кейін сұраныс артып, жеке наубайхана ашуды мақсат етеді. Бүгінде кәсіпорын Сарқан ауданымен қатар көршілес Ақсу ауданының бірқатар ауылын да нан өнімдерімен қамтамасыз етіп отыр.
Жеті жыл бұрын шағын ғана бастамамен ашылған наубайханада қазір алты адам еңбек етеді. Оның төртеуі – наубайшы, екеуі – жүргізуші.
– Кәсібімді алғаш екі қап ұнмен бастадым. Бір қап ұннан шамамен 130 бөлке нан шығады. Қазір Сарқаннан бөлек Ақсу ауданының Қаракемер, Қызылту, Қызылтаң, Сағабүйен, Қарашілік ауылдарына өнім жеткіземіз. Нанның сегіз түрін – батон, плетенка, лепешка, сайка, заводской, үй наны, қалаш және түрлі тоқашты дайындаймыз. Соңғы уақытта қазанжаппа пісіруді де қолға алдық, – дейді Әсем Тынысбекқызы.
Кәсіпкердің айтуынша, бұл салаға кездейсоқ келмеген. Алғаш тандыр нан пісіріп, оны Сарқан мен Жансүгірдегі тұтынушыларға жеткізіп жүрген. Сол кезден бастап үлкен наубайхана ашуды армандаған. Бүгінде сол арманы жүзеге асып, кәсібінің арқасында шаңырақ көтеріп, тәжірибе жинақтаған.
Наубайханада ұзақ жыл еңбек етіп келе жатқан Күләтай Асқанбаева мен Нұргүл Әубәкірова өз ісінің шеберлері. Жасы жетпіске таяған Күләтай апа жас буынға тәжірибесін үйретуден жалықпайды. Көпбалалы ана Қарлығаш Аятбекова да ұжымға жаңадан қосылып, кәсіби машығын шыңдауда.Ал ыстық нанды елге дер кезінде жеткізіп жүрген Ерденбек Ілиясов пен Қасым Ерқасылұлы өз міндеттеріне жауапкершілікпен қарайды.
Бүгінде наубайхана бес отбасының нәпақасын айырып отыр. Әсем Қалабаеваның алдағы жоспары – өнім сапасын одан әрі арттырып, нан өндірісінде озық тәжірибе жинақтау.
Жақсылық ЖОМАРТҰЛЫ
Сарқан ауданы
