– Биыл облыста 6250 гектар жерге картоп егілді. Оның 3692,1 гектары шаруашылықтарға, 2557,9 гектары жеке қосалқы шаруашылықтарға тиесілі. Бүгінгі күнге дейін 2,7 мың гектар немесе 43,7 пайызы жиналып, 57,4 мың тонна өнім қамбаға құйылды. Бұл көрсеткіш өткен жылғы 56,8 мың тоннадан сәл жоғары. Орташа өнімділік гектарына 209,9 центнерді құрады (былтыр 208,2 центнер). Егін жинау жұмыстары әлі жалғасып жатыр, – дейді облыстық ауыл шаруашылығы басқармасының бөлім басшысы Аманбек Қасымов.
Ескелді ауданында биыл 53408 гектар жерге масақты дәнді, майлы дақылдар, картоп, көкөніс пен бақша өнімдері, мал азығы және қант қызылшасы егілді. Оның ішінде 1116 гектарға картоп себілді. Қазірдің өзінде 910 гектары жиналып, 18883 тонна өнім алынған. Орташа түсім гектарына 207 центнерді құрады.
– Ауданда мемлекет тарапынан ауыл шаруашылығын дамытуға қолдау көрсетіліп, диқандарға субсидиялар мен жеңілдетілген несиелер берілуде. Биыл 888 млн. теңгеге 56 бірлік ауыл шаруашылығы техникасы алынды. Көктемгі дала жұмыстарына 428,5 тонна жанар-жағармай бөлініп, толық жеткізілді. Күзгі науқанға 270,8 тоннаға өтінім беріліп, бүгінге дейін 13 шаруашылық 152,9 тоннасын алып үлгерді. Қалған бөлігі бойынша жұмыс жүргізілуде. Сонымен қатар, аудан бойынша 5 900 тонна минералды тыңайтқыш жоспарланған, қазіргі таңда 5 076 тоннасы алынып, жоспардың 86 пайызы орындалды, – дейді аудан әкімінің орынбасары Айдын Исабеков.
Ауыл шаруашылығы тұрақты даму жолына түскен ауданда қазіргі уақытта 1 842 шаруа қожалығы, 27 ЖШС, 11 өндірістік кооператив, 6 сервистік-дайындау орталығы және 31 ауыл шаруашылығы кооперативі тіркелген. Солардың ішінде көкөніс өсірумен айналысатын «Нам» шаруа қожалығы өңірге танымал. Бүгінде олардың алқаптарындағы картоп, жүгері, қант қызылшасы мол өнім беруде.
– Биыл 50 гектарға картоп септік. Жаздағы аптап суды көп қажетсінетін дақылдарға қиындық тудырды. Дегенмен, тынымсыз еңбектің арқасында шығынға батпадық. Болжам бойынша гектарынан 208 центнерден өнім аламыз, – дейді қожалық жетекшісі Виктор Нам.
Жалпы алғанда, биыл картоп өндірісі облыс көлемінде де, Ескелді ауданында да тұрақты өсім көрсетті. Орташа өнімділік өткен жылмен салыстырғанда жоғары. Мемлекеттік қолдаудың арқасында техника жаңартылып, жанар-жағармай мен тыңайтқыш толық жеткізілуде. Бұл жағдай ауыл шаруашылығы саласының әлеуетін арттырып, жергілікті халықты сапалы өніммен қамтуға және аудан экономикасын нығайтуға жол ашып отыр.
Қажет АНДАС
