Талдықорған қаласына қарасты Ащыбұлақ саяжайында балаларға арналған спорттық ойын алаңы қолданысқа берілді.
Аймақ ардагерлерімен бірге жаңа ойын алаңының лентасын қиып, ашылу салтанатына қатысқан Талдықорған қаласы әкімінің орынбасары Қуаныш Сейтімбетов елдімекен тұрғындарын жүрекжарды қуанышымен қүттықтап, ізгі тілегін жеткізді.
Саяжай тұрғындарының сөзінше, негізі бұл балалар алаңын салып беру туралы бастама өткен жылы қала әкімінің тұрғындармен кездесуінде көтерілген. Көп өтпей ол өтініш те орындалып, бүгін балалар жаңа ойын алаңында ойнауға мүмкіндік алды. Алаңда балалардың қауіпсіздігі үшін барлық жағдай жасалған. Айналасы қоршалып, жұмсақ төсеніштер төселіп, сапалы ойын құралдары қойылған.
– «Барлық талаптарға сай жабдықталған бұл балалар алаңы саяжай тұрғындарының өтінішіне сай «Халық қатысатын бюджет» бағдарламасы аясында салынды. Мұнда өздеріңіз көріп тұрғандай қосымша шағын бір футбол алаңы да бар. Жыл соңына дейін Талдықорған аумағында дәл осындай тағы 4 ойын алаңы қолданысқа берілмек. Міне, бұл жас бүлдіршіндердің ой-өрісін кеңейтіп, олардың жастайынан спортқа деген құлшынысын арттыра түсетіні анық», –дейді қала әкімінің орынбасары.
Шара соңы ауыл балаларының спортық жарысымен жалғасып үздіктер марапатталды.
Айдын КӘЛІМХАН
