Талдықорған қаласындағы «Жанұя» Отбасын қолдау орталығында «Заң мен тәртіп» идеологиясы аясында азаматтарды қабылдау шарасы өтті, – деп хабарлайды 7-su.kz ақпараттық порталы.
Бұл бастама қиын жағдайға тап болған немесе құқықтық кеңеске зәру жандар үшін таптырмас мүмкіндікке айналды. Мұнда мемлекеттік қызметшілер мен заңгерлер кабинетте отырып емес, халықпен бетпе-бет кездесіп, қордаланған мәселелерді жедел шешуге күш салды. Орталықтың мақсаты – әрбір отбасына қажетті қолдау көрсетіп, қоғамдағы әлеуметтік шиеленісті азайту.
«Ашық есік күні» аясында пробация қызметінің өкілдері, сот орындаушылары, адвокаттар және психологтар жұмыс істеді. Мамандар құқықтық кеңес берумен шектелмей, азаматтардың әлеуметтік жағдайына да талдау жасады. Көмекке жүгінгендердің басым бөлігі – көпбалалы аналар, жалғызбасты ата-аналар және мүмкіндігі шектеулі жандар.
Шара барысында адвокаттың көмегін алған қала тұрғыны А. есімді азаматша өз әсерімен бөлісті:
«Бүгін мен Отбасын қолдау орталығына келіп, адвокат кеңесін алдым. Мен мүгедектігі бар баланы асырап отырған жалғызбасты анамын. Мәселем тұрғын үйге қатысты болды. Кеңес алған соң нақты қадамдарымды түсіндім».
Мұндай кері байланыс орталық жұмысының тиімділігін айқын көрсетеді. Жай ғана бағыт-бағдар беру емес, мәселенің заңдық қыр-сырын түсіндіру адамдарға үлкен септігін тигізеді.
Орталық басшысы Жанар Нұрмұханованың мәліметінше, бір күн ішінде 30-ға жуық адамның өтініші қаралды. Өтініштердің сипаты әртүрлі болғанымен, ең өзектілері – баспана кезегі және банк шоттарының бұғатталуы.
– Орталыққа келіп жатқан азаматтарға құқықтық, психологиялық және басқа да кеңестер берілуде. Көмек алушылардың басым көпшілігі тұрғын үй мәселесі және шоттары бұғатталған тұлғалар болды. Қазіргі таңда екі азаматтың шотын ашу мәселесі шешімін табуда, – деді Жанар Нұрмұханова.
Сот орындаушыларының қатысуы әсіресе қарызы бар немесе шоттары жабылған азаматтар үшін пайдалы болды. Мамандар заң шеңберінде шотты қалай ашуға болатынын және берешекті бөліп төлеу мүмкіндіктерін түсіндірді.
Талдықорғандағы «Жанұя» орталығы тек мерекелік күндері емес, күнделікті негізде де тегін көмек көрсететін мекеме. Мұнда келушілерге психологиялық жеңілдік жасау үшін арнайы бөлмелер де қарастырылған. Күрделі жағдайда қалған жандарға заңгерлік көмектен бөлек, моральдық демеу де өте қажет.
Мұндай «Ашық есік» форматтағы шаралар халықтың мемлекеттік органдарға деген сенімін арттырады. Азаматтар өз мәселелерін бүкпесіз айтып, мамандардан нақты жауап алады. Бұл – «Халық үніне құлақ асатын мемлекет» тұжырымдамасының іс жүзіндегі көрінісі. Алдағы уақытта орталық мұндай кездесулерді тұрақты түрде өткізуді жоспарлап отыр.
