Жетісу облысының орталығында Талдықорған қаласы әкімінің орынбасары Жеңіс Андабековтің төрағалығымен азаматтарды әскерге шақыру комиссиясының кезекті отырысы өтті.
Қаладағы Қорғаныс істері жөніндегі басқармада өткен жиынға аталған саланың өкілдері, қалалық полиция және денсаулық сақтау мекемелерінің жетекші мамандары қатысты. Күн тәртібінде 2025 жылдың күзгі мерзімді әскерге шақыру науқанының барысы қаралды. Кездесу барысында комиссия мүшелері әскерге шақырылған азаматтардың психологиялық дайындығын, денсаулық жағдайын және Отан алдындағы борышын өтеуге деген құлшынысын тағы бір мәрте нақтылады.
Қорғаныс саласындағы жауаптылардың сөзінше, әскерге бару – әр азаматтың парызы. Қазақстан Республикасының Конституциясының 36-бабының 1 және 2-тармақтарына сәйкес, Қазақстан Республикасын қорғау – әрбір азаматтың қасиетті парызы және міндеті. Азаматтарды мерзімді әскери қызметке шақыру Қазақстан Республикасының «Әскери қызмет және әскери қызметшілердің мәртебесі туралы» заңының 31-бабына сәйкес, ел Президентінің жарлығы және Үкімет қаулысы негізінде жылына екі рет жүргізіледі. Әскерге шақыру, кейінге қалдыру немесе шақырылудан босату негізінен 18 жастан 27 жасқа дейінгі азаматтарды қамтиды. Сонымен бірге бүгінде еліміздің Қарулы Күштерінде сарбаздардың әскери борышын абыроймен атқаруы үшін барлық жағдай жасалған. Бір жылдық әскери қызметін ойдағыдай аяқтаған азаматтар жоғары оқу орындарына тегін түсуге, сондай-ақ кәсіби әскери мансапты жалғастыруға мол мүмкіндік алады.
Талдықорған қаласы әкімдігінің баспасөз қызметінің мәліметінше, биыл облыс орталығынан 200 азаматты мерзімді әскери қызметке жіберу жоспарланған. Оның ішінде 78 сарбаз еліміздің Қарулы Күштері қатарында әскери борышын өтемек. Бүгінге дейін 48 азамат аттандырылған. Ал бұл жолғы комиссия отырысының қорытындысы бойынша 54380 әскери бөліміне тағы 30 азамат жолдама алған. Енді алдағы уақытта еліміздің Ұлттық ұлан сарбаздары сапына тағы 54 азаматты жөнелту жоспарланып отыр. Сонымен қатар қазір Мемлекеттік күзет қызметінде – 2, ҚР Ұлттық қауіпсіздік комитеті Шекара қызметінде – 19 азамат өз борышын өтеуде. Ал биылғы жылдың көктемгі әскерге шақыру науқанының қорытындысы бойынша Талдықорған қаласынан 185 азамат мерзімді әскери қызметке жіберілген болатын.
Айдын КӘЛІМХАН
