Қазақстан Республикасы Үкіметінің қаулысымен Асылбек Амантайұлы Ахметжанов Қазақстан Республикасының оқу-ағарту вице-министрі қызметіне тағайындалды.
Асылбек Ахметжанов 1993 жылы Алматы қаласында дүниеге келген. Л.Н. Гумилев атындағы Еуразия ұлттық университетін және Қазақ технология және бизнес университетін тәмамдаған.
Мемлекеттік қызметін 2016 жылғы қаңтарда ҚР Инвестициялар және даму министрлігі Байланыс, ақпараттандыру және ақпарат комитетінің Мемлекеттік көрсетілетін қызметтерді оңтайландыру басқармасында сарапшының міндетін атқарушы ретінде бастаған.
2016–2018 жылдары ҚР Ақпарат және коммуникациялар министрлігінің «Электрондық үкімет» және мемлекеттік көрсетілетін қызметтерді дамыту департаментінде сарапшы болып жұмыс істеді.
2018–2019 жылдары ҚР Цифрлық даму, инновациялар және аэроғарыш өнеркәсібі министрлігінде бас сарапшы,
2019–2021 жылдары ҚР Экология, геология және табиғи ресурстар министрлігінің басқарма басшысы қызметтерін атқарды.
2021–2024 жылдары ҚР Цифрлық даму, инновациялар және аэроғарыш өнеркәсібі министрлігінің Цифрлық трансформация департаменті директорының орынбасары болды.
2024–2025 жылдары ҚР Өнеркәсіп және құрылыс министрлігінің Цифрландыру және мемлекеттік көрсетілетін қызметтер департаментін басқарды.
2025 жылдың ақпан айынан бастап осы уақытқа дейін ҚР Цифрлық даму, инновациялар және аэроғарыш өнеркәсібі министрлігінің Архитектура және цифрлық трансформация саясаты департаментінің директоры қызметін атқарған.
«Жетісу-Ақпарат»
