– Сіздерді мемлекеттік мереке ҚР Конституциясының 30 жылдығымен шын жүректен құттықтаймын. Конституция – Отанымыздың берік іргетасы, әрбір азаматтың құқығы мен бостандығын қорғайтын басты құжат. Себебі, ол егеменді елімізді әлемдік қауымдастықтың беделді мүшесіне айналдырған, демократиялық дамудың сара жол нұсқаушысы. Сондай-ақ, мемлекеттің саяси, әлеуметтік, экономикалық табыстарына негіз болып отырған негізгі қағидаттар. Тамыры терең тарихи Ата Заңымыз біз үшін зор мақтаныш, биік мәртебе. Тәуелсіздіктің тірегі болған Конституция күні біздерді елдікке, жасампаз істерге бастайтын баянды бағдар. Сондықтан бүгінгі келіп жеткен Конституцияның 30 жылдығы бәріміз үшін ұмытылмас үлкен белес. Бұл мереке бірлігіміздің, берік қамалды елдігіміздің айқын айғағы. Тәуелсіздігіміз тұғырлы, Ата Заңымыз айбынды болсын! – деді Ернат Дүйсенбекұлы.
Ата-Заң ел дамуының кепілі. Нақтырақ айтқанда, 1995 жылы 30 тамызда бүкіл халықтық дауыс беру арқылы қабылданған бұл құжат бүгінде өз кемелдігімен көпке үлгі. Кезінде 3 жарым миллионға жуық адам қатысып, 32 мыңға тарта құнды ұсыныстардан сараланған еліміздің бас заңы барлық заңдардың қайнар көзі. Бұл заң азаматтардың бас бостандығы мен құқық мүддесін жан-жақты қамтамасыз етумен бірге, ел экономикасының еселеп артуына тың серпін береді.
Мерекелік шара «Талдықорған әуендері» халықтық, фольклорлық этнографиялық ән-би ансамблінің концерттік бағдарламасына ұласты. Айта кетерлігі, Жетісу облысы бойынша Конституцияның 30 жылдығы аясында 300 тағылымды іс-шара ұйымдастырылған.
Айдын КӘЛІМХАН
