Текелі қаласына қарасты Рудничный ауылдық округіндегі 456 референдум учаскесіне ауылдың ақсақалдары ұлттық киім киіп, елдік іске бейжай қарамайтын азаматтық ұстанымын танытты. Салтанаты мен сәні жарасқан қарияларды көрген ауыл тұрғындары аға буынның белсенділігіне сүйсініп, оны өздеріне үлгі етті.
Маңызды саяси науқанға қатысып, дауыс берген ауыл ақсақалы Орынбай Мәулембайұлы бұл күннің мән-маңызына тоқталды.
– Менің жасым 73-те. Өмір бойы адал еңбек етіп, ұрпағымның амандығын, елімнің тыныштығын тілеп келемін. Балаларымды өсіріп, немере сүйіп отырған бақытты жанмын. Бүгін референдумға өмірлік қосағым Айғалишамен бірге келдік. Кеше ғана Амал мерекесі – Көрісу күні өтті. Наурыз мейрамы да басталды. Ұлыстың ұлы күні қарсаңында ұлттық киім кию – халқымыздың дәстүрі. Сондықтан ауыл қариялары осы жолы да ұлттық киіммен келіп, дауыс беруді жөн көрдік. Еліміз өсіп-өркендей берсін. Елдің ертеңі – білімді де іскер жастардың қолында. Мағжан ақын айтқандай, саналы, алғыр жастарға сеніміміз зор. Біз бүгін тек өзіміз үшін емес, өскелең ұрпақтың жарқын болашағы үшін дауыс бердік, – деді ол.
Ауыл ақсақалы елдің бірлігі мен болашағына ақ батасын беріп, жастарды ел тағдырына бейжай қарамауға шақырды. Ұлттық дәстүрді ұлықтап, қоғамдық маңызды іске белсенді қатысқан қариялардың бұл қадамы ауыл тұрғындарына ерекше рух сыйлады.
