Президент тапсырмасы бойынша арнайы мемлекеттік қордан Жетісу облысындағы ауылдарды сумен жабдықтау үшін қаражат бөлінді.
Мемлекет басшысының тапсырмасын іске асыру аясында өңірлерде азаматтардың өмір сүру сапасын жақсарту үшін қайтарылған активтер қаражаты есебінен әлеуметтік маңызды инфрақұрылымды дамыту бойынша жұмыстар жүргізілуде. Үкімет арнайы мемлекеттік қордан облыстағы сумен жабдықтау жүйесін қайта құру және салу жобаларына шамамен 480 миллион теңге қаражат бөлді.
Жоба Ескелді ауданы Қоңыр ауылында 17 шақырым және Қаратал ауданы Ұмтыл ауылында 4,8 шақырым желі салуды қамтымақ. Нәтижесінде мыңнан аса ауыл тұрғыны сумен қамтамасыз етіледі. Биыл облыста сумен жабдықтау жүйелерін салу және реконструкциялау бойынша барлығы 18 жоба іске асырылуда.
Биылғы жылдың қорытындысына сәйкес орталықтандырылған сумен қамтамасыз етілген елді мекендердің үлесін 99,9%- ға дейін жеткізу көзделіп отыр. Яғни, бұл 329 ауыл мен облыстың 697 мыңға жуық тұрғыны.
А. Байжұмақызы
