«Аспирин алу үшін енді Сарқанға бармаймыз. Себебі ауылда өз дәріханамыз бар». Бұл – алмалылықтардың қуанышы. Бірлігі жарасқан ауылда «Sivers farm» атауымен дәріхана ашылды.
Алманың атасы саналған Сиверс алмасы Іле және Жоңғар Алатауы тауларындағы әлемде теңдесі жоқ жабайы орманды алқаптармен тығыз байланысты екені белгілі. Міне, дәл осы атаумен кәсіпкер Зарина Карахан дәріхана ашып, ауылдастардың ыстық ықыласына бөленуде. Сиверс алмасын бренд жасап, болашақта үлкен дәріхана желісін ашуды жоспарлаған кәсіпкер туған жердің байлығын әлемге танытсам дейді. Sarkand_insta парақшасын жүргізіп, ауданның тыныс-тіршілігіне назар аударып, тұрғындар өтінішіне құлақ түріп жүретін кәсіпкер-блогер алмалылықтардың өтінішін аяқсыз қалдырмаған. Халық үнін кәсіпкер естіп, тұрғындар тілегі орындалды.
– Біз жер, мал шаруашылығымен айналысамыз. Кейінгі жылдары Сарқан қаласынан дәріхана аштық. Үнемі халық ішінде жүргендіктен тұрғындардың өтінішін сұрау басты міндетім. Бұл ауыл ауыл болғалы дәріхана болмаған. Енді, міне, жаны жайсаң жақсылар келіп, өздеріне қажетті дәрі-дәрмекті алып, бізге алғыс айтуда. Болашақта шалғай елді мекендерге де дәріхана ашсақ деген жоспар бар. Бірақ бізде маман тапшы. Ауылды жерге келіп, жұмыс істейтін білімді де білікті маманды табу өте қиын. Алайда біз жолақысын төлеуге, еңбек демалысын беруге, ауырып қалған жағдайда көмектесуге, декреттік демалысқа шығуына заң аясында көмектесеміз. Сатылған тауардан түсетін пайыздық жеңілдік те қосып беріп отырмыз, – дейді кәсіпкер.
Исатай РАЙХАНОВ, ауыл тұрғыны:
– Қасиетті ауылымызда жылт еткен жақсылық болса баладай қуанамыз. Соңғы жылдары ауылымыз көркейіп, гүлденіп келеді. Күні кеше ғана спорт кешені, дәріхана ашылды. Дәрі-дәрмек қажет бола қалса жүгіріп келіп, қажеттінің бәрін алып жүрміз. Тіпті, біздерге, яғни, зейнеткерлерге жеңілдік те бар. Ауылдағы ағайын үшін осыдан артық не керек! Жас ұрпақтың дені сау, саналы, білімді болсын дегеннен артық тілек жоқ бізде.
Бүгінде дәл осы медицина саласында 6 маманды жұмыспен қамтып отырған Зарина Карахан тұрғындар қалтасына салмақ түспейтін бағаны тұрақты қадағалайды. Сонымен қатар, белгілеу жүйесі қосылғалы мемлекет бекітілген құнға бір тиын да қосуға заң қарсы.
Қайырымдылық жасауға жаны құмар кәсіпкер зейнеткер және мүмкіндігі шектеулі жандарға 3-5 пайыз жеңілдік те қарастырған. Бұл ауыл тұрғындары үшін үлкен көмек.
Дәріханада Назым Джантылова ауылдағы ағайынға қызмет көрсетуде. Фармацевт қызметін 3 жыл атқарған ол келген әрбір тұтынушыны күліп қарсы алып, күліп шығарып салады. «Ауыл деген сондай жылы ғой. Келген әрбір тұрғын құтты болсын айтып, шашуын шашып, біздің қуанышымызды еселеп жатыр. Біздің дәріханада болмай қалған дәріні дереу қаладан алдыртамыз. Арасында үлкен кісілер қан қысымын өлшетуге де келіп тұрады. Барлық тауардың бағасы Сарқан қаласындағы дәріханалармен бірдей. Ауылдағы ағайынның ақ пейіліне ризамыз», – дейді маман.
Алмалылық тұрғындардың қуанышында шек жоқ. Әсіресе, көпбалалы аналар бала ауырғанда аяқасты дәрі таппай қиналып қалатындарын айтуда. Қазір дәріхана таңғы 8.00-ден кешкі сағат 20.00-ге дейін қызмет көрсетеді.
Еңлік кенеБАЙ
Алмалы ауылы,
Сарқан ауданы
