Астана, Алматы, Шымкент қалаларында және Қазақстанның 16 облысында 5 ақпанда дауылды ескерту жарияланды.
Бұл туралы 7-su.kz ақпараттық порталы «Қазгидромет» РМК-ның баспасөз қызметіне сілтеме жасап хабарлайды.
Қарағанды облысының батысында таңертең және күндіз жаяу бұрқасын соғып, жолдарда көктайғақ байқалады. Батыс, солтүстік және оңтүстік аудандарда тұман түседі. Оңтүстік-шығыстан және оңтүстіктен соққан желдің жылдамдығы 15-20 м/с-қа дейін жетеді. Қарағанды қаласында түнгі және таңғы сағаттарда тұман болады.
Ұлытау облысының бірқатар аумағында жауын-шашын түсіп, қар мен жаңбыр араласады. Көктайғақ пен жаяу бұрқасын тіркеледі, ал солтүстік, батыс және орталық бөліктерде тұман түседі. Желдің екпіні 15-20 м/с. Жезқазған қаласында күндіз жауын-шашынмен қатар көктайғақ пен тұман болады.
Ақмола облысында түнгі ауа температурасы –17…–22 градусқа дейін төмендеп, батыс аймақтарда –25 градусқа жетеді.
Астанада қар мен жаңбыр жауып, жолдарда көктайғақ қалыптасады. Жаяу бұрқасын соғып, оңтүстіктен соққан желдің екпіні 15-20 м/с болады.
Атырау облысының солтүстік, шығыс және оңтүстік бөліктерінде жаяу бұрқасын байқалады. Солтүстік-батыстан соққан жел 15-20 м/с-қа дейін күшейеді. Атырау қаласында желдің жылдамдығы 15-18 м/с шамасында болады.
5-6 ақпан күндері Жетісу облысының солтүстігі, орталығы және таулы аймақтарында тұман түседі. Алакөл көлдері маңында жел күшейіп, кей жерлерде 23-28 м/с-қа дейін жетеді.
Маңғыстау облысының бірнеше ауданында қар жауып, жаяу бұрқасын соғады. Көктайғақ байқалып, солтүстік-батыстан соққан желдің екпіні 15-20 м/с болады. Ақтау қаласында түнгі және таңғы уақытта жел күшейеді.
Түркістан облысының батысы, оңтүстігі, солтүстігі мен таулы өңірлерінде тұман түседі. Оңтүстік-батыстан соққан желдің екпіні 15-20 м/с-қа жетіп, тау асуларында 28 м/с-қа дейін күшеюі мүмкін. Шымкент пен Түркістан қалаларында жел жылдамдығы 15-20 м/с болады.
Ақтөбе облысында ауа температурасы 7-12 градус аяз болып, батыс пен солтүстікте 15-20 градусқа дейін төмендейді. 6 ақпанға қараған түні қатты аяз күшейіп, –28 градусқа дейін жетуі ықтимал. Ақтөбе қаласында түнгі ауа температурасы –25 градусқа дейін төмендейді.
Қостанай облысында қар жауып, бұрқасын соғады. Оңтүстік және шығыс аймақтарда жауын-шашын түсіп, жолдарда көктайғақ қалыптасады. Кей аудандарда тұман байқалады. Желдің екпіні 15-20 м/с. Қостанай қаласында түнгі және таңғы уақытта бұрқасын болады.
Ақтөбе облысының оңтүстігі, шығысы және орталық бөлігінде жаңбыр мен қар аралас жауын-шашын түсіп, тұман мен көктайғақ байқалады. Күндіз жаяу бұрқасын соғып, желдің жылдамдығы 18 м/с-қа дейін жетеді.
Абай облысының батысы мен орталығында жаяу бұрқасын болып, оңтүстігінде тұман түседі. Жарма ауданында жел екпіні кей тұстарда 28 м/с-қа дейін күшейеді.
Қызылорда облысының орталық бөлігінде қатты жауын-шашын түседі. Батыс пен орталықта көктайғақ пен бұрқасын байқалып, солтүстік аудандарда тұман түседі. Желдің екпіні 15-20 м/с. Қызылорда қаласында да тұман байқалады.
Жамбыл облысында кей уақыттарда тұман түседі. Таулы және бірқатар аудандарда жел күшейіп, екпіні 23 м/с-қа дейін жетуі мүмкін. Тараз қаласында да тұман байқалады.
Алматы облысының оңтүстігі мен таулы өңірлерінде тұман түседі. Оңтүстік-шығыстан соққан желдің екпіні 15-20 м/с. Алматы мен Қонаев қалаларында түнгі және таңғы сағаттарда тұман болады.
