29 қыркүйекте Қазақстанның барлық өңірінде қолайсыз ауа райына байланысты дауылды ескерту жарияланды, – деп хабарлайды 7-su.kz ақпараттық порталы «Қазгидромет» РМК баспасөз қызметіне сілтеме жасап.
Синоптиктердің мәліметінше, түнде және таңертең тұман түсіп, кей жерлерде -1…-3°С аяз болады. Бірқатар облыста жауын-шашын қарға ұласып, көктайғақ күтіледі. Шығыс пен орталықта қатты жаңбыр жауып, бұршақ пен дауыл болуы ықтимал. Оңтүстік және оңтүстік-шығыста найзағай ойнап, желдің екпіні 15–20 м/с-қа дейін жетеді.
Сонымен қатар Маңғыстау, Түркістан, Атырау, Қызылорда, Ұлытау, Жамбыл және Ақтөбе облыстарының кей аумақтарында төтенше өрт қаупі сақталып отыр.
Мамандардың айтуынша, алдағы күндері ауа райы құбылмалы болып, республикада қысқы сипаттағы алғашқы құбылыстар байқалуы мүмкін.
