Қазақстанда мемлекеттік қызметтердің бірқатарының бағасы айтарлықтай қымбаттауы мүмкін. Мәжіліс депутаттары Салық кодексіне енгізілетін өзгерістер жобасын талқылап жатыр. Оған сәйкес, неке бұзу процесі үшін алынатын мемлекеттік бажды қазіргі 0,5 АЕК-тен (2025 жылы — 1 966 теңге) 5 АЕК-ке (19 660 теңге) дейін арттыру ұсынылып отыр, деп хабарлайды 7-su.kz желілік басылымы.
Бұл ұсыныс туралы Мәжіліс депутаты Берік Бейсенғалиев пікір білдірді. Оның айтуынша, бұл өзгеріс адамдарды неке бұзу туралы шешімді қабылдағанда байыппен, ойланып шешім қабылдауға итермелейді. Әсіресе жастар арасында негізсіз ажырасулардың алдын алу мақсатында мұндай қадам жасалып отыр.
«Мемлекеттік бажды көтеру – ажырасуға байланысты шешімді тек эмоцияның әсерімен емес, мұқият әрі саналы түрде қабылдауға ықпал етуі тиіс. Бұл бастама бюджетті толықтыруды көздемейді. Негізгі мақсат – қоғамда некеге және отбасылық жауапкершілікке деген көзқарасты тереңдету», – деді депутат.
Аталған ұсыныстың мақсаты – отбасылық құндылықтар мен жауапкершілікке деген көзқарасты қалыптастыру.
Фото: pixabay.com
