Азат Перуашев Қазақстан-Қытай шекарасында жүк көліктерін электронды кезекке қоятын жобаға қатысты көңілі толмайтынын жеткізді. Енді барлық олқылықтарды партия төрағасы Үкімет деңгейінде көтермек. Себебі, жыл басынан бері шекарада кезегін күткен жүк көліктердің саны азаяр емес.
Алматы облысындағы жұмыс сапары барысында «Ақ жол» демократиялық партиясының төрағасы Азат Перуашев Қазақ-Қытай шекарасына барды. Ол жерде «Nur joly» кеден бекетінде кезекте тұрған жүргізушілердің шағымын тыңдады. Бірнеше айдан бері сарғая кезектерін күткен жүргізушілер электронды кезектің де жұмысы көңілдерінен шықпағанын айтады. Яғни, жүргізуші кезегінің жылжығанын көріп отырады. Бірақ оның алдында және одан кейін қандай жүк көліктердің тұрғанын көре алмайды.
Дәл осы жайт азаматтардың кезек дұрыс сақталмайды деген күдігін тудырған. Қазірдің өзінде 500-ге жуық көлік кезекте тұр. Шағымдарды тыңдаған Азат Перуашев мәселені Үкімет деңгейінде көтеретінін жеткізді.
Айта кетейік, осыдан бір ай бұрын Алматы облысындағы «Nur joly» кеден бекетінде жүк көліктері толықтай электронды кезекке қойылатынын хабарланған еді. Панфилов ауданының әкімдігі мәліметінше, бұл кезекпен «Euro Transit« ЖШС айналысуда. Елімізде пандемия басталған сәттен бастап «Nur joly» кеден бекетінде жүк көліктерінің ұзын-сонар кезегі қалыптасқан. Тіпті, кезекте тұрған көліктердің ұзындығы 60 шақырымнан асты. Мәселенің күрделенуіне Қытай тарапының көліктерді қабылдауды күрт азайтқаны себеп.
Шекарадағы мәселемен танысу «Ақ жол» демократиялық партиясының Талдықорғанда өткен жиыны аясында жалғасын тапты.
