Саналы жасты тәрбие-леу – аға буынның борышы. Оларға оң жол көрсетіп, опындырмайтын іспен шұғылдандыратын тағылымды тұлғаның бағдар беріп тұрмағы қай уақытта да маңызды. Осы ретте облыс әкімі Бейбіт Исабаевтың бастамасымен жүзеге асырылып жатқан «Әдеп-құқық жұмысы жөніндегі ментор» жобасының көпке шарапаты тиіп жатқанын сөз ете кеткен жөн.
Биылғы қыркүйектен бастап облыс көлемінде 51 ментор өз жұмысына кіріседі. Солардың бірі Саян Нүсіпжанов. Ол өзі туып-өскен Көксу ауданындағы Қадырғали Жалайыри атындағы мектеп-гимназияға ментор болып тағайындалып отыр. Түрлі лауазымда қызмет еткен жас маман аталған жоба аясында алғаш рет жұмыс істейді
– Жетісу облысының әкімі Бейбіт Өксікбайұлының бастамасымен қоғамдық даму басқармасы жанынан іске қосылған «Әдеп және құқық жұмысы жөніндегі ментор» жобасының мәні тереңде екенін ұғынғанымыз дұрыс. Келешек ұрпақтың парасатты азамат болып қалыптасуына, қоғамда өз орнын табуына атсалысқанымыз құптарлық іс. Бұл жауапкершілігі мол жұмыспен бірден айналысып кету оңай еместігін түйсінеміз. Аймақ басшысының идеясымен жүргізіліп отырған жобаны Қадырғали Жалайыри атындағы мектеп-гимназиясының 7-сынып оқушыларына таныстырдым. Оның мән-мазмұнымен, мақсат, бағыт, міндеттеріне тоқталып түсіндірме жұмыстарын жүргіздім, – деді ментор Саян Нүсіпжанов.
Өткен оқу жылынан бастап Талдықорған қаласында 31 ментор, Панфилов ауданындағы 50 мектепте 37 ментор жұмыс жасап бүгінгі күнге дейін игілікті іс атқаруда. Жобаның өткен жылдардағы нәтижесін айтар болсақ Панфилов ауданында жасөспірімдер қылмысы 22-ден 5-ке, Талдықорған қаласы аумағында 34-тен 8-ге дейін төмендеген. Бұл дерек облыстық полиция департаментінен алынып отыр.
– Былтыр бұл жоба пилоттық жүйеде жүргізілсе, биыл барлық аудан мен қалаларда енгізілді. Оған аудан әкімдерінің орынбасарлары жауапты. Жауапты тұлғалар арасында чаттар ашылды. Ол жерге оқушылар арасындағы құқықбұзушылықтар, басқа да жағдаяттар жөнінде ақпараттар жіберіліп отырады. Сәйкесінше бекітілген мамандар дереу әрекетке көшіп, көңіл бөледі. Қазіргі таңда менторларымыз оқудан өтті. Өздерінің жұмыстарына дайын. Күнделікті балалармен бірге жұмыстарын жалғастыратын болады, – дейді облыстық қоғамдық даму басқармасы басшысының орынбасары Ілияс Түстікбаев.
Айта кетейік, аталған бастаманың негізгі мақсаты – оқушылардың тұлғалық дамуын менторлық сүйемелдеу, балалар мен ересектердің желілік әлеуметтенуі, кемсітушілік, зорлық-зомбылық және құқыққа қайшы мінез-құлықтың барлық түрлерінің алдын алу арқылы бірыңғай тәрбие кеңістігін қалыптастыру.
Ясин ОРАЛБЕК
