ҚР Сауда және интеграция министрлігінің Жетісу облысы бойынша сауда және тұтынушылардың құқықтарын қорғау департаментіне биылғы 9 айда 643 азаматтан өтініш келіп түскен.
Аталған өтініштің 138-іне құқықтық көмек көрсетіліп, 368-іне ақпараттық түсініктеме берілген. Сондай-ақ, 162 тексеру (КТ – 148, ТҚҚЗ – 14) мемлекеттік бақылау жүргізілген. Сотқа 31 тұтынушыдан шағым түсіп, осы кезеңде тұтынушыларға қайтарылған қаражаттың жалпы сомасы 41 миллион теңгеден асқан. Бұл туралы тұтынушылардың құқықтарын қорғау және электрондық сауданың өзекті мәселелері туралы сөз етілгені брифингте айтылды.
Осыған байланыстым ҚР СИМ Жетісу облысы бойынша сауда және тұтынушылардың құқықтарын қорғау департаментінің басшысы Айдос Дауешовтың баяндамасы тыңдалып, журналистер тарапынан қойылған сұрақтарға жауап қайтарылды. Департамент басшысының сөзінше, шағымдардың басым бөлігі бөлшек және электрондық сауда, тұрғын үй-коммуналдық шаруашылығы мен тұрмыстық, туристік, білім беру, байланыс, қоғамдық тамақтандыру, медициналық, қаржылық, көлік, басқа да сала қызметтерінен келіп түскен.
Кәсіпкерлер тарапынан заңнаманы жүйелі бұзу, халықтың тұтынушылық мәдениеті мен құқықтары туралы ақпараттану деңгейінің артуы өтініштердің негізгі себебіне айналған. Әр өтініш бойынша тексеру жүргізіліп, бұзушыларға ұйғарымдар шығарылып, әкімшілік ықпал ету шаралары қолданылған. Мемлекеттік бақылау саласы бойынша атқарылған жұмыстар да ауқымды. Осыған байланысты биыл 12 объектіге профилактикалық тексеру жүргізіліп, нәтижесінде сауда қызметін реттеу туралы заң талаптарының бұзылуы, әсіресе әлеуметтік маңызы бар азық-түлік тауарларына бағаны асыру бөлігінде бұзушылықтар анықталған.
Бұзушылықтарды жою туралы ұйғарымдар берілген.
Сондай-ақ, 139 жоспардан тыс тексеру жүргізіліп, көп жағдайда әлеуметтік маңызы бар азық-түлік тауарларына сауда үстемелерін асыруға байланысты сауда қызметін реттеу туралы заң талаптарының бұзылуы анықталған. Бұзушылыққа жол бергендер әкімшілік жауапкершілікке тартылған. Сонымен бірге брифингте тұтынушылардың құқықтарын қорғау саласы бойынша жүргізіліп жатқан жұмыстар да баяндалды. Спикер соңында тұтынушының қызметтер туралы толық және анық ақпарат алуға, еркін таңдауға және қауіпсіздікке құқығы бар екенін айтып, шағымдармен eGov, Telegram-бот арқылы немесе департаментке жеке жүгінуге болатынын еске салды.
