Облыс әкімдігінің жанындағы кәмелетке толмағандардың істері және олардың құқықтарын қорғау жөніндегі комиссияның отырысы өтті. Басқосуға комиссия мүшелері, басқарма басшылары және аудан, қала әкімдерінің орынбасарлары қатысты. Облыс әкімінің орынбасары Марлен Көлбаевтың төрағалығымен өткен жиынның күн тәртібінде алты мәселе қаралды.
Кәмелетке толмағандардың арасындағы құқықбұзушылықтар мен қылмыстың жағдайы туралы 9 айдың қорытындысын айтқан жергілікті полиция қызметі басқармасы бастығының орынбасары Аида Белгібаева күн санап жасөспірімдер арасында қылмыстың артқанын жеткізді. Өткен жылмен салыстырғанда биыл кәмелетке толмағандар жасаған қылмыс 64,7 пайызға өскен.
– Балаларды уақытша оқшаулау орталығына 78 кәмелетке толмаған бала жеткізілген. Олардың 61-і қадағалаусыз және панасыз қалғандар, 17-сі ата-анасының немесе олардың орнындағы адамдардың қамқорлығынсыз қалғандар. Әкімдіктердің жанындағы Кәмелетке толмағандардың істері және олардың құқықтарын қорғау комиссия отырыстарында 220 іс-құжат қаралып, қорытындысымен 10 адам ата- аналық құқығынан айырылды, 8 тұрғынның құқықтары шектелді, – деді Аида Елеуқызы.
Марлен Көлбаев қылмыстың алдын алу, азайту мақсатында атқарылған жұмыстар, қолданған шаралар туралы жауапты мамандардан сұрады. Бірақ тұшымды жауап болмады.
– Бала тағдыры ойыншық емес. Оған бәріміз де жауаптымыз. Сондықтан бұл іске немқұрайдылық танытпаңыздар. Баламен еркін, ашық сөйлесу керек. Ол қылмысқа не үшін барғанын, енді қайта қайталамауын түсіндіру керек. Қол қусырып отырмай, жұмысты күшейтіңіздер, – деген облыс әкімінің орынбасары жауапты мамандарға тапсырма жүктеді.
«Әдеп және құқық жұмысы жөніндегі ментор» жобалық кеңсесінің жұмысы, балалардың тамақтануын ұйымдастыру және стандарттарды, нормаларды, санитарлық талаптарды сақтау, сәтсіз отбасындағы оқушы балалардың жағдайы, олардың тиісті жабдықтармен, тегін үйірмелермен, ата-аналарының жұмыспен қамтылуы, мобильді топтардың құрылуы, кешкі мектепке оқушыларды қабылдау талаптарының орындалуы турасында мамандар баяндама жасады. Жұмыс барысында кеткен кемшіліктерді, жіберілген қателіктерді түзеу үшін нақты тапсырма беріліп, жұмысына селқос қарағандардан түсініктеме алынып, тиісті әкімшілік шара қабылданатын болады.
Еңлік КЕНЕБАЙ
Фото: freepik.com
