2025 жылдың 16 қыркүйегінен бастап елімізде жаңа заң күшіне енеді. Қылмыстық кодекске енгізілген 232-1-бапқа сәйкес, өз атына рәсімделген банк картасы немесе есепшотын үшінші тұлғаға берген азамат қылмыстық жауапкершілікке тартылмақ, – деп хабарлайды 7-su.kz ақпараттық порталы.
Заңды бұзғандар үшін жаза қатаң:
-
160 айлық есептік көрсеткіш (шамамен 629 000 теңге) көлемінде айыппұл;
-
немесе 7 жылға дейін бас бостандығынан айыру жазасы қолданылуы мүмкін.
ІІМ азаматтарды абай болуға шақырып, “Ақша оңай келеді” деген уәделердің артында алаяқтық тұратынын ескертеді.
“Дроппер – жай ғана құрал емес, ол қылмыскердің серігі. Болашағыңызды қауіпке тікпей, заңды сақтап, өзіңізді және отбасыңызды қорғаңыз”, – делінген министрліктің мәлімдемесінде.
Бұл өзгеріс “ҚР Қылмыстық заңнамасын оңтайландыру мәселелері бойынша кейбір заңнамалық актілерге өзгерістер мен толықтырулар енгізу туралы” заң шеңберінде қабылданған.
Дроппер деген кім?
Дроппер – алаяқтар ұрланған немесе заңсыз жолмен алынған қаражатты қолма-қол ақшаға айналдыру үшін пайдаланатын адам. Мұндай тұлғалар атына банк карталары рәсімделіп, ақша аударылып, кейін қолма-қол алынады. Бұған дейін заңнамада дропперлерді жауапқа тартуға нақты негіз болмағандықтан, олар көбіне куәгер ретінде ғана қаралатын.
Ресми деректерге сай, 2024 жылы ғана ақшаны жылыстатуға пайдаланылған 6 200 дроп-карта анықталып, солар арқылы 24 миллиард теңге заңсыз айналымға түскен.
Жаңа заң қабылданған соң мұндай әрекеттерге қатысқандар тікелей қылмыстық жауапкершілікке тартылады.
