Талдықорған қаласында «Аутизм және басқа да менталды бұзылулары бар балаларға арналған күндізгі болу орталығы» коммуналдық мемлекеттік мекемесінде арнаулы әлеуметтік қызмет көрсететін мамандарға арналған семинар-тәжірибеден өтті.
«Педагогикалық шеберхана: аутизм спектрі бұзылыстары бар балалармен жұмыс стратегиялары мен әдістемелері» атты семинарға облыстың барлық ауданынан 31 маман арнайы шақырылған.
Іс-шараның басты мақсаты – ерекше балалармен жұмыс істейтін педагогтар мен әлеуметтік қызметкерлердің кәсіби біліктілігін арттыру, заманауи әдістемелермен тәжірибе алмасу.
Бұл орталық 1,5 жастан 18 жасқа дейінгі мүгедектігі бар 143 балаға жартылай стационар жағдайында арнаулы әлеуметтік қызмет көрсетіп келеді. Мұндағы әр баланың жеке қабілеті мен мүмкіндігін ескере отырып, дамуына және әлеуметтенуіне жағдай жасалған. Сонымен қатар, орталық ата-аналарға да психологиялық және әлеуметтік қолдау көрсетіп, қоғамда инклюзивті көзқарас қалыптастыруға үлес қосып отыр.
Мекеме директорының орынбасары Гүлназ Әуелбекова орталықтың ерекшелігі туралы айтып өтті:
– Біздегі жұмыс жүйесі басқа орталықтардан өзгеше. Мысалы, балаларға арналған еңбек шеберханасы мен әлеуметтік-тұрмыстық бағдарлау кабинеті бар. Мұнда психолог, дефектолог, логопед және арттерапия мамандары тұрақты түрде жұмыс істейді. Соның нәтижесінде бүгінге дейін 23 бала оң нәтижеге қол жеткізіп, жалпы білім беретін балабақша мен мектепке барды. Бұл – ұжым еңбегінің, ата-аналармен бірлескен жүйелі жұмыстың жемісі, – дейді ол.
Орталықтың ашылғанына бар болғаны екі жыл болса да бұл – өткізіліп отырған екінші семинар. Мамандар мұндай тәжірибе алмасу алаңдарының кәсіби деңгейді көтеруге, жаңа әдістемелерді меңгеруге зор мүмкіндік беретінін атап өтті.
Ерекше балалардың дамуы мен әлеуметтенуі – қоғамның ортақ міндеті. Осы бағыттағы жүйелі жұмыстар мен мамандардың жанашыр еңбегі болашақта инклюзивті қоғам қалыптастыруға серпін берері сөзсіз.
Санжар СҰЛТАНҒАЗЫ
