Тәжікстан астанасы Душанбе қаласында әйелдерді қорғау және олардың мүдделерін ілгерілету тетіктерін талқылауға арналған қазақ-тәжік форумы өтті.
Іс-шара аясында қаржылық сауаттылықты арттыру, олардың экономикалық жағдайын жақсарту, оның ішінде кәсіпкерлік бастамаларды іске асыру бойынша мемлекет тарапынан қолдау көрсету мәселелері көтерілді. Форум басым бағыттар бойынша ынтымақтастықты дамыту алаңы ретінде қызмет етеді. Сонымен бірге екі елдің маңызды мәселелерін талқылау мен шешудегі әйелдердің рөлін арттыру мүмкіндіктерін кеңейтеді.
Шараға Қазақстан тарапынан ҚР Президенті жанындағы Әйелдер істері және отбасылық-демографиялық саясат жөніндегі ұлттық комиссияның өкілдері, «Атамекен» ҚР Ұлттық Кәсіпкерлер палатасының Іскер әйелдер кеңесінің өкілдері, оның ішінде Жетісу облысының іскер әйелдер кеңесі, сондай-ақ әйелдер құқықтары саласындағы сарапшылар қатысты.
Жиында Жетісу облысы іскер әйелдер кеңесінің төрағасы Римма Салықова әйелдер форумының екі мемлекет тарихында алғаш рет өткізіліп отырғанын және түркітілдес елдермен ынтымақтастықта жұмыс жүргізілетінін сөз етті. Айта кетейік, Тәжікстанда кәсіпкер әйелдер кеңесі жұмыс істейді және президенттік гранттар бөлінеді. Сондай-ақ, отбасы және әйелдер істері жөніндегі комиссия қызмет көрсетеді. Соңында қатысушылар іскерлік байланыс орнату, сондай-ақ бірлескен жұмыс туралы пікірлерін ортаға салды.
Атап айтқанда, туризм мен қол- өнер саласын өркендетуге баса көңіл бөлінді. Өз кезегінде іс-шараны ұйымдастырушылар Тәжікстан Республикасы Үкіметі жанындағы Әйелдер және отбасы істері комитеті атынан форум Қазақстан мен Тәжікстан әйелдері жағдайын жақсартуға қатысты мәселелерді талқылау және тәжірибе алмасу үшін маңызды платформаға айналғанын атап өтті.
Айгүл Байжұмақызы
