Облыс әкімі Бейбіт Исабаев тұрғындармен кезекті қоғамдық қабылдау өткізіп, жұршылықтың әлеуметтік-экономикалық мәселелерге қатысты қойған сауалдарына жауап берді. Қабылдауға кірген 3 адамның екеуі тұрғын үй мәселесін көтерді.
Талдықорған тұрғыны Г. Разбекова үй кезегінде 10 жылдан бері тұр. Ол денсаулық жағдайына байланысты апа-сіңлілерімен бірге тұрғанымен, отбасы құрамында өзінен басқа ешкім көрсетілмеген, сондықтан Г. Разбековаға заң бойынша бір бөлмелі үй берілуі тиіс. Осыған байланысты кезек ретімен үй алу мүмкіндігін қарастыра келе, отбасында бірге тұратын туған апа-сіңлілерінің де құжаттарын қосымша өткізу ұсынылды.
Ескелді ауданы, Бақтыбай ауылының тұрғыны, көпбалалы ана Сәуле Бақытжан да мемлекеттік тұрғын үй қорынан үй берілсе деген өтінішпен келіпті. Ол І топтағы мүгедектігі бар бала асырап отырғандықтан, тұрмысқа қолайлы жағдай жасалған үйге мұқтаж екенін жеткізді. Бақтыбай ауылының тұрғыны 2017 жылдан бастап мүмкіндігі шектеулі баласы бар отбасы ретінде «Халықтың әлеуметтік осал топтары» санатына тіркеліпті. Ескелді ауданының тұрғын үй кезегіне №437 болып тіркелген отбасының қазіргі кезегі 177. Осыған орай өтініш иесіне мәселенің заң аясында шешілетінін айтты.
Панфилов ауданының тұрғыны Ләйлә Мұхаева Жаркент қаласында «Жайлы мектеп» жобасымен салынған жаңа мектепте оқитын 1 мыңнан астам баланың көпшілігі қаланың бір шетінде тұратындықтан, оқушыларға тасымал ұйымдастырылса деген ұсынысын айтты. Жалпы бекітілген талап бойынша тасымалдау ісі негізінен елді мекендер арасында жүргізіледі, бір елді мекен ішіне тасымалдау қарастырылмаған. Дегенмен, облыс әкімі Бейбіт Исабаев қаланың ішінде балаларын мектепке апарып-әкелуге мүмкіндігі жоқ, алыс тұратын отбасылар үшін автобус ұйымдастыру мәселесін қарастыруды тапсырды. Панфилов ауданының әкіміне білім басқармасымен бірлесіп, Жаркент орта мектебіне оқушыларды тасымалдау қажеттілігін зерделеп, қалаішілік маршруттарын ыңғайластырып, өзгерту немесе демеушілер есебінен ұйымдастыру мәселесін заңнамада белгіленген тәртіппен қарастыруды жүктеді.
Айдар ҚАЛИЕВ
Фото: Жеңіс ЫСҚАБАЙ
