Бүгін Астанада Мемлекет басшысы Қасым—Жомарт Тоқаевтың қатысуымен өткен барлық деңгейдегі мәслихат депутаттарының республикалық форумы еліміздің қоғамдық—саяси өміріндегі ең елеулі оқиғаның біріне айналды.
Форумда Президент әлі де бір қайнауы кем кейбір өзекті мәселелер мен тақырыптарға тоқталып, оларды шешудің жолдарын қарастырды. Атап айтқанда, мәслихаттардың тиімділігі жергілікті өзін өзі басқару институтының негізгі тетігі саналатын депутаттардың кәсібилігіне тікелей байланысты екендігіне тоқталған Мемлекет басшысы: «Мәслихат – мемлекеттік биліктің өте маңызды тармағы. Аймақ жұртшылығының тыныс-тіршілігі, мұң-мұқтажы қашанда мәслихат депутаттарының жіті назарында болуы тиіс» – деп жауапкершіліктің жеңіл еместігін ұғындырды.
Осыған орай депутаттық корпустың басты міндеті – сайлаушылардың сенім үдесінен шығып, сайлауалды бағдарламада айтылған міндеттер мен стратегиялардың толығымен орындалуын бақылауда ұстау екендігін атап өткім келеді.
Халық сайлаған біз секілді депутаттарға қарата үндеу тастаған Қасым-Жомарт Тоқаев алдағы уақытта облыстық мәслихаттардың сайлауы аралас жүйемен өтетінін, ал аудандық деңгейдегі депутаттар мажоритарлық жүйемен сайланатынын еске салды. Бұны мен еліміздің демократиялық бағытқа жасалған сенімді қадамы деп білемін. Сондықтан келешекке бірлесе қадам басайық!
Ризван САКИОВА,
Жетісу облыстық мәслихатының депутаты
Фото: Ақорда
