Қазақстанның еңбек сіңірген қайраткері, танымал әнші Гүлзира Бөкейхан 57 жасына қараған шағында өмірден өтті, – деп хабарлайды 7-su.kz ақпараттық порталы.
Суыт хабарды Дүниежүзі қазақтарының қауымдастығы ресми түрде жеткізді. Гүлзира Бөкейхан – атажұртқа Қытайдан оралып, қазақ өнерін асқақтатқан бірегей дауыс иесі. Ол қандастар арасынан шығып, елге алғаш танылған өнер жұлдыздарының бірі ретінде тарихқа енді.
Қауымдастық өкілдері марқұмның өнердегі жолы мен атқарған еңбегін зор күйзеліспен еске алды:
«Гүлзира Бөкейхан – шетелде жүріп-ақ қазақтың қасиетті ән өнерін сақтап, елге оралған соң ұлт руханиятына өлшеусіз үлес қосқан бірегей жан еді. Оның асқақ үні мен сахнадағы дара болмысы халық жадында мәңгі сақталады», – делінген ресми көңіл айту хатында.
Әнші тек Қазақстан сахналарында ғана емес, Дүниежүзі қазақтарының қауымдастығы ұйымдастырған халықаралық іс-шараларда да белсенділік танытқан. Ол шетелдерге жасалған мәдени сапарларда қазақтың дәстүрлі әнін төрткүл дүниеге паш етіп, ұлттық мұрамызды жаңа белеске көтерді. Гүлзира ханымның орындауындағы әндер талай тыңдарманның жүрегінен орын алып, атажұртқа деген сүйіспеншілікті арттырды.
Қазақ жұртшылығы үшін бұл орны толмас қаза. Өнер иесінің артында бай мәдени мұра мен өшпес із қалды. Оның өмір жолы – қиядан келіп, ұлттық өнердің шыңына шығудың шынайы үлгісі.
