Үшарал қаласында «ҮЕҰ-ны дамытудың жаңа мүмкіндіктері» атты облыстық форум өтті. Шара Алакөл ауданының ішкі саясат, мәдениет, тілдерді дамыту және спорт бөлімінің мемлекеттік әлеуметтік тапсырысы аясында, «Алакөл ауданында 2025-2027 жылдарға арналған ҮЕҰ консалтинг орталығының қызметін ұйымдастыру» жобасы бойынша жүзеге асырылды.
Облыстық Азаматтық Альянстың және аудандық сала мамандары, жастар ісі жөніндегі нұсқаушылар мен қоғамдық ұйым жетекшілері қатысқан басқосуда ҮЕҰ қызметін тіркеу, есеп беру, мемлекеттік бағдарламаларға қатысу шарттары және заңнамалық өзгерістер талқыланып, әлеуметтік бастамалар мен жаңа жобалар ұсынылды.
Форум аясында бірқатар белсенді азаматтар марапатталды. Атап айтсақ, «Alakol BasQaru» қорының төрайымы Нұргүл Догаманова, «Назар» қоғамдық бірлестігінің мүшесі Жадыра Нүсіпова, «Игілік Алакөл» бірлестігінің төрайымы Анар Түктібаева әлеуметтік белсенділігі мен жобалардағы жетістіктері үшін грант иегері атанды. Сонымен қатар, Куляра Бектемисоваға Қазақстанның Азаматтық Альянсы атынан азаматтық қоғамды дамытуға қосқан үлесі үшін Алғыс хат табысталды. Форум шеңберінде «Жігер» мүгедектер қоғамдық бірлестігінің төрайымы Ажар Қыдыралина қолөнер бұйымдарынан көрме ұйымдастырып, көпшілік назарына ұсынды.
«Жетісу – Ақпарат»
