Мемлекет басшысының тапсырмасымен педагогтердің қоғамдағы беделін арттыру бағытында биылғы жылы тың бастама қолға алынуда. Ұстаздар күні қарсаңында еліміздің бас қаласында білім саласына еңбегі сіңген мұғалімдерге ерекше құрмет көрсетілді.
Қазақстан Республикасының Оқу-ағарту министрлігі білім беру жүйесін дамытуға айрықша үлес қосқан ұстаздарды арнайы марапаттады. Бұл шараға еліміздің әр өңірінен 120-ға жуық педагог жиналды. Оқу-ағарту бірінші вице-министрі Майра Мелдебекова Ұстаздар күнімен құттықтап, министрлік атынан Алғыс білдірді.
«Мемлекет басшысының тапсырмасымен педагогтердің қоғамдағы мәртебесін арттыру бағытында тың бастамалар қолға алынып жатыр. «Ұстазға алғыс!» апталығы – ұстаздарымызға деген ризашылығымызды білдіру мен құрмет көрсетуге арналған маңызды шара. Біз ұстаздардың еңбегін әрдайым жоғары бағалап, оларға ерекше құрметпен қараймыз», – деді оқу-ағарту бірінші вице-министрі Майра Мелдебекова.
Марапатталған ұстаздардың қатарында Ақсу ауданына қарасты Кеңғарын ауылының мұғалімі Қаламқас Маженова да бар. Ол еңбек жолын Ақсу ауданына қарасты Кеңғарын орта мектебінде жас педагог болып бастап, 40 жылға жуық қызмет етіп келеді. Қаламқас Бөкенқызы сапалы білім мен тәрбие беру ісінде өзінің саласын жетік меңгерген педагог-зерттеуші. Шәкірттеріне біліммен қатар адамгершілік пен парасаттылықты да сіңіре білді. Әр баланың тұлға болып қалыптасу жолында үздіксіз еңбек етіп, қазіргі таңда да мұғалімдік миссиясын мінсіз атқаруда.
Алтын күзбен бірге келетін ұстаздар күніне орай Елордада өткен басқосу, ұлағат иелеріне ерекше көңіл күй сыйлады. Еліміздің бас қаласы Астанаға арнайы шақырылған құрметті қонақтар министрлік ғимаратында шәкірттерінің жұмыс орнымен танысты. Мұғалімдерге арнайы мерекелік кеш те ұйымдастырылды.
Бұл марапат – еліміздің барлық ұстазына көрсетілген ерекше құрмет десек артық айтқанымыз емес.
ӨЗ ТІЛШІМІЗ
