Ақсу ауданында «Жанұя» отбасын қолдау орталығы жұмысын жүйелі жүргізіп келеді. Орталықтың негізгі міндеті – өмірлік қиын жағдайға тап болған азаматтар мен отбасыларды ерте анықтап, оларға әлеуметтік, психологиялық, құқықтық және тұрмыстық бағытта көмек көрсету.
Жұмыс тобының басты мақсаты – қиын жағдайды асқындырып алмай, мәселені ерте кезеңде анықтап, тиісті көмекті уақытында ұйымдастыру. Мобильді топ мүшесінің барлығы «FSM social» платформасына тіркелген. Осы жүйе арқылы тұрғындардың өтініштері қабылданып, олардың мәселесін шешуге бағытталған жұмыстар жүргізіледі.
– Әрбір өтініштің артында адам тағдыры тұр. Сондықтан біз келген әрбір сигналға жай ғана есеп ретінде қарамаймыз. Отбасының нақты жағдайын зерделеп, қажет болған жағдайда әлеуметтік, психологиялық немесе құқықтық көмек көрсетудің жолдарын қарастырамыз, – дейді «Жанұя» отбасын қолдау орталығының әлеуметтік жұмыс жөніндегі маманы Жанай Ерғалиев.
Оның айтуынша, мобильді топ жұмысының тағы бір маңызды бағыты – қауіп-қатер болуы мүмкін жерлерді анықтап, алдын алу шараларын жүргізу. Есептік кезеңде топ мүшелері қираған, құрылыс жұмыстары аяқталмаған және қараусыз қалған бірқатар нысанды аралап, олардың жағдайын зерделеген. Есеболатов ауылдық округі, Таусамал ауылы, Жансүгіров ауылы, Егінсу және Сағакүрес елді мекендеріндегі, сондай-ақ Қапал ауылы аумағындағы бірқатар нысанға мониторинг жүргізілген.
– Біз үшін ең маңыздысы – қиындыққа тап болған адамды жалғыз қалдырмау. Кейде азаматқа мәселенің шешімін табуға бағыт көрсетудің өзі үлкен көмек. Ал кей жағдайда әлеуметтік қызметпен қатар медициналық, құқықтық немесе психологиялық қолдау қажет болады. Осындай кезде тиісті мекемелермен бірлесіп жұмыс істейміз, – дейді Жанай Ерғалиев.
Бүгінде орталықта 19 қызметкер, олардың қатарында әлеуметтік мамандар, заңгер, психологтар халыққа қызмет етеді. Мамандардың әрқайсысы түрлі тағдыр иелерімен жұмыс істеп, азаматтардың қиындықтан шығуына мүмкіндік жасауға күш салуда. Орталық аудандық білім бөлімі, полиция бөлімі, пробация қызметімен және орталық ауруханамен өзара ынтымақтаса жұмыс істейді. Осы мекемелер арасында тиісті меморандумдарға қол қойылып, азаматтардың құқықтары мен қауіпсіздігін қамтамасыз ету, тұрмыстық зорлық-зомбылықтың алдын алу және құқықбұзушылық профилактикасын күшейту бағытында бірлескен шаралар өткізілуде.
– Адам қандай да бір қиындыққа тап болған кезде көмек сұраудан ұялмауы керек. Біздің мақсатымыз – ешкімді кінәлау емес, мәселенің шешімін бірге іздеу. Қажет болса, азаматты тиісті мекемеге бағыттап, сол жердегі қызметтің қолжетімді болуына ықпал етеміз. Әр отбасының жағдайы әртүрлі болғандықтан біз де әр мәселеге жеке қараймыз, – дейді Жанай Ерғалиев.
«Бірлік бар жерде – тірлік бар» дейді халқымыз. Ендеше, қиындыққа тап болған отбасыларға қолдау көрсету, олардың қоғамнан шет қалмауына жағдай жасау – адамдықтың да, азаматтық жауапкершіліктің де көрінісі. «Жанұя» отбасын қолдау орталығының жұмысы осы міндетті нақты істер арқылы жүзеге асыруға бағытталған.
Гүлжан ТҰРСЫН
