Адамзат тарихында ең әуелі жаратылған құндылықтың бірі – сөз. Сөзді өнерге айналдыру арқылы ақындар дүниеге келді. Олар адам сезімінің терең қатпарларын жырлап, халыққа эстетикалық ләззат сыйлап келеді. Сондықтан да ежелден ақындар қауымы ерекше жаратылған жандар саналады.
Бүгін – халықаралық ақындар күні. Бұл мереке 1999 жылғы 15 қарашада ЮНЕСКО-ның Бас конференциясының 30-сессиясында бекітілді. Ұйым шешімінде аталып өткендей, мерекенің басты мақсаты – «поэтикалық өзін-өзі білдіру арқылы тілдік алуандықты қолдау және жойылып кету қаупі бар тілдерге естілу мүмкіндігін беру».
Поэзия күнін белгілеу туралы алғашқы бастамалар ХХ ғасырдың 30-жылдарында көтерілген. 1938 жылы АҚШ-тың Огайо штатында ақын Тесса Суизи Уэббтің бастамасымен 15 қазан — ежелгі рим ақыны Вергилийдің туған күні — Поэзия күні болып жарияланды. 1951 жылға қарай бұл күн АҚШ-тың 38 штатында және Мексикада Ұлттық поэзия күні ретінде аталып өтті. Кейіннен ол өзге елдерде де Әлемдік поэзия күні ретінде тойлана бастады.
