Жапониялық Toyota бренді электромобильдер нарығында жаңа сатыға көтерілді. 2024 жылы Гуанчжоуда концепт ретінде таныстырылған bZ7 моделі сериялық нұсқаға айналып, 2026 жылдың басында әлемдегі ең ірі автонарық саналатын Қытайда сатыла бастады, – деп хабарлайды 7-su.kz ақпараттық порталы Autonews сайтына сілтеме жасап.
Айта кетерлігі, бұл модель толығымен дерлік қытайлық технологияларға негізделген. Оны Toyota-ның Қытайдағы интеллектуалды зерттеу орталығы мен Guangzhou Automobile Group (GAC) компаниясы бірлесіп әзірлеген. Өндіріс Гуанчжоудағы GAC-Toyota бірлескен кәсіпорнында жолға қойылған. Сарапшылар Toyota bZ7 моделін танымал Camry седанының заманауи және экологиялық баламасы деп атап отыр.
Техникалық ерекшеліктері мен жабдықталуы
Жапондық мамандар архитектураны игеру кезінде жергілікті озық әзірлемелерді пайдаланған. Көліктің негізі ретінде қытайлық GAC AEP 3 платформасы алынған, ал қозғалтқыш жүйесі технологиялық алпауыт Huawei компаниясының DriveONE жетегімен жабдықталған.
Жаңа седанның басты артықшылықтары:
-
Автопилот және қауіпсіздік: Көлікте соңғы үлгідегі BMW және Mercedes-Benz модельдеріне ұқсас интеллектуалды жүйелер каскады орнатылған.
-
Ақылды үй: Автомобиль «ақылды үй» жүйесімен толық интеграцияланған, бұл жүргізушіге көлік ішінде отырып-ақ үй құрылғыларын басқаруға мүмкіндік береді.
-
Лидар технологиясы: Жоғары жиынтықталымдарда (710 Ultra) жол жағдайын барынша дәл бақылайтын LiDAR сенсорлары қарастырылған.
Бағасы мен бәсекелестік
Toyota bZ7-нің бағасы көптеген автоәуесқойларды таңғалдырып отыр. Қытай нарығында көліктің базалық 600 Pro нұсқасы 179 800 юаньнан (шамамен 11 млн теңге) басталса, ең үздік 710 Ultra LiDAR жиынтығы 239 800 юаньға (шамамен 14,7 млн теңге) бағаланған.
Осындай қолжетімді бағасының арқасында жапондық седан нарықтағы негізгі бәсекелестері BYD Han, Xiaomi SU7 және Tesla Model 3-ке лайықты қарсылас атанбақ. Автокөліктің сыртқы дизайны мен ішкі жабдықталуы оның бизнес-класс деңгейіне толық сәйкес келетінін көрсетеді. Мамандардың пікірінше, бұл модель жақын арада параллельді импорт арқылы басқа елдердің де нарығына жетуі ықтимал.
Жапондық сапа мен қытайлық цифрлық технологиялардың тоғысуы Toyota-ның жаңа дәуірін бастап бергендей.
