«Алтын емел» мемлекеттік ұлттық табиғи паркінің ғылыми ақпарат және мониторинг бөлімінің қызметкерлері таяуда Басши орманшылығы аумағында табылған Қазақстанның Қызыл кітабына енгізілген дала қыранының ұясына фототұзақ орнатты.
Дала қыраны ұяны әдетте ашық далалы, жартылай шөлейтті немесе жазық жерлерде салады. Ұяларын кейде жерге, кейде биік бұталарға немесе тастардың үстіне орналастырады. Ұяға бұтақ, шөп немесе жануарлардың жүні төселеді. Әдетте аналығы 2, кейде 1 немесе 3 жұмыртқа салады.
Жұмыртқа басу мерізі 43-45 күн. Бұл кезеңде көбіне аналық басады.
Ал аталығы тамақ тасиды. Балапандар бір уақытта емес, бірінен соң бірі шығады. Алғашқы шыққан балапан әдетте күшті болады. Ал әлсізі кейде тірі қалмауы мүмкін. Балапандар толық қауырсынданған соң 45-55 күн шамасында ұядан ұшып кетуге дайын болады. Осы уақыт ішінде ата-анасы оларға қорек әкеп тұрады.
Балапандар ұядан ұшқаннан кейін бірнеше апта бойы ата-анасына тәуелділігін жоғалтпайды. Айта кетейік, дала қыраны Қазақстанның Қызыл кітабына енгізілген, яғни, ол сирек және қорғалатын құс түрі болып саналады.
Айгүл Байжұмақызы
