Түркістанда студенттер мен жатақхана қызметкері арасындағы дау видеоға түсіп, әлеуметтік желіде тарады. Кадрларда қыздардың бөлмелерді мәжбүрлі түрде жинатып жатқанын айтып шағымданғаны көрінеді, – деп хабарлайды 7-su.kz ақпараттық порталы КТК сюжетіне сілтеме жасап.
Оқиға желі қолданушылары арасында қызу талқылануда. Бейнежазбада жатақхана коменданты студент қыздарға өз бөлмелерінен бөлек, дәретхана мен ұлдардың бөлмесін де тазалатқаны айтылған.
Видеодағы әйел бұл жағдайды былай түсіндіреді:
«Күнде “тазала” деп мәжбүрлеп жатқан жоқ қой. Ертең СЭС-тен, яғни Санитариялық-эпидемиологиялық бақылау департаментінен комиссия келеді. “Осы жатақхананың ашылуына рұқсат, балалар жатуға рұқсат” деген комиссия келе жатыр. Сол үшін істейміз деп жатырмыз», – дейді ол.
Оқиғаға қатысты Түркістан облысы білім басқармасы пікір білдірді. Ведомствоның мәліметінше, арнайы комиссия құрылып, тексеру басталған.
Басқарма өкілдерінің хабарлауынша, 2026 жылғы 23-25 ақпан күндері өтетін облыстық спартакиадаға қатысушыларды жатақханаға орналастыру қажеттілігі туындаған. Осыған байланысты тәрбиеші мен вахта қызметкерлері студенттерге ауызша ұсыныс білдірген. Жатақханада студент жігіттердің уақытша болмауына байланысты, қыздардан бос бөлмелерді тазалауға көмек сұралған. Алайда кейбір студенттердің бас тартуына байланысты түсініспеушілік туындаған.
«Қазір студенттермен және ата-аналарымен түсіндіру жұмыстары жүргізіліп жатыр. Білім басқармасы білім алушылардың құқығы мен қауіпсіздігін қамтамасыз етуді басты назарда ұстайды. Ішкі тәртіп талаптарын күшейту және осындай жағдайлардың алдын алу мақсатында қосымша шаралар қабылданды. Жауаптыларға қатысты заңға сәйкес тиісті шешім қабылданады», – деп мәлімдеді басқарма өкілдері.
<
Посмотреть эту публикацию в Instagram
/div>
