«Жетісу» волейбол клубын алда үлкен сын күтіп тұр. Биыл көктемде Филиппинде өткен Азия чемпиондар лигасында жеңіске жетіп, клубтар арасындағы Әлем чемпионатына қатысуға жолдама алған. Желтоқсанға жоспарланған жаһан жарысында қазақстандық команда сары құрлықтың намысын қорғайды. Ал оған дейін ел ішіндегі жарыстарда сынға түседі.
«Жетісу» – Азия кубогын төбесіне көтерген Қазақстандағы «Рахат» (2004ж., 2007ж.), «Алтай» (2021ж.) және «Қуаныштан» (2022ж.) кейінгі төртінші команда. Ал бір маусымда ел чемпионатын ұтып, Қазақстанның Суперкубогымен Кубогын жеңіп, қосымша Азиядан алтын алған «Алтайдан» кейінгі екінші команда. Бір қызығы, «Алтайдың» сол жетістігіне тікелей себепші бапкер Марко Гршич дәл осы нәтижесін «Жетісумен» қайталады.
– Дайындық жақсы. Құрамада аздаған өзгерістер бар. Шілденің ортасынан бастап команда Талдықорғанда жаттығып жатыр. Тек Әлем чемпионатына байланысты Украина құрамасының сапында ойнаған Дарья Шаргородская жарысты аяқтап, қатарға енді қосылды. Былтырғы құрамның 90 пайызы қалды. Ресей чемпионатындағы «Енисей» сапында ойнаған тәжірибелі Мария Фролова командамызға келді. Жаттықтырушылар құрамын кеңейтіп, арнайы мамандар шақырттық. Жеңіске жету жолында барымызды саламыз, жанкүйерлерімізді қуантқымыз келеді, – дейді команданың бас бапкері Марко Гршич.
Биыл ел чемпионатының жүйесі өзгерді. Осыған дейін бір айда бір тур болған болса, алдағы уақытта кіші және үлкен турдың ойындары болады. «Жетісу» кіші турда «А» тобында «Берел» (Шығыс Қазақстан облысы), «Тұран» (Түркістан облысы) және «Алматы» командаларымен ойнайды.
– Күнделікті екі уақыт жаттығып жатырмыз. Маусымның басталар сәтін өзіміз де тағатсыздана күтіп жүрміз. Биыл да барымызды салып, жеңіс жолында аянып қалмаймыз, – дейді Қазақстан ұлттық құрамасының және «Жетісу» командасының ойыншысы Перизат Нұрбергенова.
«Жетісу» Қазақстан суперкубогын төртінші рет алса, Қазақстан кубогы мен ел чемпионатында тоғыз мәрте жеңіске жетті (Ел чемпионатын ең көп жеңген командалар – «Жетісу» 9 рет, «Рахат» 8 мәрте, «Алтай» 7 рет). Ал Азия кубогының жолында осыған дейін екі рет финалдан қайтқан болса (2010ж., 2013ж.,), биыл алғаш рет топжарды.
– «Жетісу» жеңіс дәстүрін қалыптастырған клуб. Сондықтан да осалдық танытатын тұс жоқ. Осы тұрғыда облыс басшылығының зор қолдауын атап өтуіміз керек. Барлық жағдайды жасап отыр. Балалар волейболы да өңірімізде қарқынды дамып, електен өткендері «Жетісудың» қосалқы құрамына қабылданып жатыр. Алдағы уақытта жанкүйерлерге арнайы экскурсия ұйымдастырып, ойыншыларымызбен шеберлік сағатын өткізуді жоспарлап отырмыз, – деді клубтың директоры Нияз Жантілеуов.
Серік ҚАНТАЙ
