Кадрлық тапшылықты болдырмау, қай салаға да қажетті маман даярлау уақыт мінберінен түспейтін мәселе. Біршама уақыт бұрын екінің бірі – заңгер, екіншісі – есепші, экономист мамандығын таңдап, қоғам үшін қажетті мамандар сабан арасында жоғалған инедей болған еді. Қазір осындай олқылықтардың алдын алу үшін жоспарлы оқыту жолға қойылды. Мәселен, Талдықорған қаласындағы Құрылыс-техникалық колледжінің базасында қоғамдық сұранысқа орай жаңа мамандық бойынша білім беру қолға алынды. Биыл оқу орнында архитектура және дизайн сыныбы ашылды.
Санат Рамазанов басқаратын оқу орны гуманитарлық-техникалық маман даярлайтын. Қазір колледж базасы техникалық, құрылыс бағытында білім беруге көшкен. Оқу орны директоры С. Рамазанов жаңадан жасақталған сыныптар мен мамандық даярлау ісі туралы жан-жақты түсіндірді.
– Жаңа мамандықтарды даярламас бұрын нарықтағы сұраныс жайы терең зерделенді. Белгілі болғандай еңбек нарығында сәулет және дизайн саласындағы мамандардың тапшылығы байқалды. Оқу орны қабырғасына графикалық дизайнды оқытуға көштік. Қазір колледжде тәжірибелі оқытушылар құрамы бар. Кейбір ұстаздардың өндірістік тәжірибесі мол. Жаңа мамандық бойынша 25 ізденуші білім алуда, – дейді колледж директоры.
С. Рамазанов айтқандай жасақталған жаңа сыныптар заманауи технологиямен қамтылған. Тіпті, кей оқу орнында жоқ жабдықтармен қамтамасыз еткен. Ол үшін облыстық бюджет қазанынан 40 млн. теңге бөлінген екен.
Студенттерге білгенін үйретіп һәм уақыт талабына сай білім беріп жүрген Алтынай Нүкешова Л. Гумилев атындағы Еуразия ұлттық университетінде магистратурасын тамамдаған соң туған жерге еңбек ету үшін келген. Мақсат – жастарды уақыт үдерісіне сай маман етіп шығару. Ол бүгінде колледж студенттеріне сәулет өнерінің қыр-сырын үйретуде.
– Сәулет және дизайн мамандарын даярлауға көшкен оқу орны жаңа тынысын ашып отыр. Әрі сапалы білім беруді көздеген колледжде жастардың білігін шыңдауға бар жағдай жасалған. Оқытушылар студенттерге соңғы технологиялық және бағдарламалық қамтамасыз ету тетіктерін пайдалануды үйретудеміз. Бұл ізденушілерге нақты жобаларды даярлауға, бастысы нарық сұранысына сай маман болуға негіз болмақ, – деді оқытушы.
Кез келген елдің дәулетін сәулеті айшықтайды. Жаңашылдық пен жаһандану талабына сай ғимараттар салуда мықты кадр керегі әлдеқашан айшықталған. Қазір колледж қабырғасында дәріс алып жүрген Альмира Ұзақбай болашақта талай құрылыс нысанының келбетін әспеттейтініне сенімді.
– Тап қазір сандық жобалауға негізделген Revit, AutoCAD, Archicad и LumenRT бағдарламаларын игерудеміз. Өте қызықты мамандықты таңдағаныма қуаныштымын. Бастысы, болашақта алған білімім елге пайдасы тисе екен, – дейді студент.
Жыл басынан бері жаңа мамандықтарды оқытуға көшкен колледж қабырғасында «Хаус-мастер» мамандығы бойынша да шәкірттер тәрбиелеуде. Бұл мамандық бойынша нарыққа қажетті электр жабдықтаушы, дәнекерлеуші және сантехник мамандар даярламақ.
Жетісу өңіріндегі 80 кәсіпорынының нақты қажеттіліктеріне орай 15 колледже 25 мамандық бойынша маман даярлау жүзеге асуда. Ал биыл еңбек нарығына сай 13 жаңа жұмысшы мамандықтарды ашу жоспарланған еді.
Дастанбек САДЫҚ
Фото: studcar.ru
