АЭС салуды қолдау жөніндегі республикалық халықтық штаб өкілдері Көксу, Қаратал, Ескелді аудандары мен Текелі қаласында бірнеше кездесу өткізді. Халықтың АЭС салу төңірегінде туындаған сауалдарына тұщымды жауап беруді мақсат еткен жиындарда Амангелді Толамисов, Болат Керімбек бастаған ақпараттық топ әуелі Текелі қаласында болып, «Текелі ТЭК» ЖШС ұжымымен, қала тұрғындарымен жүздесті. Мұнда олар АЭС-тегі қауіпсіздік жайын, Балқаш көлінің флорасы мен фаунасының ешқандай зиян шекпейтінін, қоршаған ортаны қорғау туралы мәселелерді тізбектеді.
– Қазақстанның басты байлығы – адам. Ал сол адамның сапалы өмір сүруін қамтамасыз ету биліктің кез келген сатысының басым міндеті. Әрбір қазақстандық сапалы өмір сүруі үшін тапшылық пен таршылықты сезінбеуі керек. Біз елдің энергетикалық тәуелсіздігін шегелеп бекітеміз. Болашақ ұрпаққа энергетикалық тұрғыдан тәуелсіз, яғни экономикасы тұрақты және өркендеген Қазақстанды мұра етіп қалдырамыз, – дейді Амангелді Толамисов.
Қаратал ауданындағы сапар барысында штаб мүшелері Үштөбе қаласындағы тарихи-өлкетану мұражайында және «ТастөбеАгроФуд» ЖШС ғимаратында жиын өткізді. Мұнда Болат Керімбек бастаған топ тұрғындардың АЭС салу төңірегіндегі үрейін сейілтіп, Қазақстанды экономикалық мүмкіндіктерге жол ашатын жобаны қолдауға шақырды.
– АЭС-тің тиімділігін ядролық ғылым өкілдері, энергетиктер, сарапшылар жиі таразылап, халыққа түсіндіріп жүр. Қазірдің өзінде Қазақстан электр энергиясының тапшылығына тап болуда. Демографиялық өркендеу байқалған қоғамда электр энергиясын тұтыну көлемі енді төмендемейді. Электр жарығының тапшылық қаупі тұрғанда АЭС салудан бас тартпай, белді бекем буып, ел болып қолдау керекпіз. АЭС-тің арқасында ең алдымен, тасымалданатын жарықтан құтылып, өзімізде өндірілген жарыққа қол жетеді. Басты мәселе – экологияға зияны жоқ жасыл аймаққа айналамыз. Дені сау ұрпақ – ұлт болашағы. Көмір мен газ түтінін азайтуға үлес қосуымыз керек, – деді Болат Керімбек
Мұнан кейін АЭС салуды қолдау жөніндегі республикалық халықтық штаб мүшелері Ескелді және Көксу ауданында бірқатар кездесу өткізді.
Дастанбек САДЫҚ
